Цифрлық даму, инновациялар және аэроғарыш өнеркәсібі вице-министрі Асхат Оразбек Ресей жаһандық желіден ажыратылса, Қазақстанда интернет нашарлауы мүмкін деген сұраққа жауап берді, — деп хабарлайды Tengrinews.kz тілшісі.
«Ресейді жаһандық желіден ажыратса бұл бізге қалай әсер етеді, өйткені біздің интернет Ресей арқылы өтеді емес пе» — деп сұрады журналистер Мәжіліс отырысынан кейін.
Асхат Оразбек мұның қауесет екенін айтты.
«Бізге төнуі мүмкін деген қауіпті жан-жақты қарастырды. Бірақ Қазақстанда интернетке қатысты күрделі проблемалар болмайтынын түсіндік. Қазақстан интернетті тек Ресей арқылы алмайды. Яғни, Қазақстанда интернеттің толықтай жабылуы қауіп төндірмейді. Бұл үшін уайымдаудың қажеті жоқ», — деді Оразбек.
Сондай-ақ, алдағы уақытта байланыс нашарламайтыны айтылды.
«Қытаймен қарым-қатынас бізге Еуропадан барлық трафикті алуға мүмкіндік береді», — деп қосты ол.
