Энергетика министрі Болат Ақшолақов Қазақстандағы бензин мен дизель отынының қоры туралы айтты, — деп хабарлайды Tengrinews.kz тілшісі.
Үкімет отырысында Энергетика министрлігі басшысының айтуынша, 22 тамыздағы жағдай бойынша мұнай базаларындағы және жолдағы АИ-92 маркалы бензиннің жалпы қоры — 180 мың тонна, бұл 14 күндік қажеттілікті өтейді. Дизель отынының қоры — 220,8 мың тонна, бұл 13 күнге жетеді.
«Мұнай өңдеу зауыттарындағы қорлар: АИ-92 — 71 мың тонна; дизель отыны — 53,4 мың тонна. АИ-92 бензиніне қатысты жағдай тұрақты, жанар-жағармай құю станциясы желілерінде шектеулер жоқ», — деді министр.
Дизель отынына келсек, Ақшолақовтың айтуынша, жанармай сатуда шектеулер бар — талондар мен карточкалар арқылы жеткізуге көшу, лимит белгілеу.
«Қазіргі уақытта зауыттар жанар-жағармайды жеткілікті көлемде өндіреді. Зауыттағы қор шамамен 50 мың тонна болады, алайда зауыттан мұнай өнімдерін жөнелту тұрақсыз, бос вагон-цистерналар жеткілікті мөлшерде жеткізілмейді, вагондарды жеткізу мерзімі ұлғайған», — деді энергетика министрі.
Министрдің айтуынша, логистикалық тізбектің барлық буынының — мұнай өңдеу зауыттарының, «ҚазМұнайГаз», «Қазақстан темір жолы», сондай-ақ мемлекеттік органдардың жақсы үйлестірілген жұмысы қажет.