Мониторингтік топ әлеуметтік маңызы бар азық-түлік тауарларының бағасын тұрақтандыру мақсатында «Дина» базары, «Марко» супермаркеті және бірқатар азық-түлік дүкендерін аралады, — деп хабарлайды Өңірлік коммуникациялар қызметі.
Бағаға бақылау ҚР Сауда және интеграция министрінің 2025 жылғы 23 желтоқсандағы №362 бұйрығымен бекітілген тізімге енгізілген өнімдер бойынша жүргізілуде.
Іс-шара барысында кәсіп иелеріне биылдан бастап әлеуметтік маңызы бар азық-түлік тауарларының тізбесі 19-дан 31-ге дейін кеңейтілгені ескертілді.
Бұған дейін бұл санатқа негізінен ұн, нан, жармалар мен көкөністер кірсе, енді жаңа тізбеге піскен және мұздатылған балық түрлері, тауық еті мен тұтас тауық, сүт, айран, қаймақ, сүзбе, қатты және жартылай қатты ірімшік, сары май, I санаттағы жұмыртқа, қапталмаған қара шай және ас тұзы енгізілді.
Айта кетейік, жаңа жылдан бастап жүргізілген мониторинг нәтижесінде бағаны негізсіз көтерген кәсіпкерлер анықталған жоқ. Бұл өңірдегі азық-түлік нарығындағы жағдайдың тұрақты екенін көрсетеді.
Мониторингтік топ кәсіпкерлерге баға тұрақтылығын сақтау халықтың әлеуметтік әл-ауқатын қорғауда маңызды екенін атап өтіп, баға саясатын тұрақты бақылауда ұстау жөнінде ұсынымдар берді.
