Мемлекет пен қоғам өмірінің негізі саналатын Конституция – елдің дамуы мен тұрақтылығының басты тірегі. Әрбір мемлекеттің саяси жүйесі мен құқықтық негізі осы негізгі заң арқылы айқындалады. Сондықтан да Конституцияны халықтың еркін білдіретін, мемлекеттің болашағын айқындайтын құжат деуге толық негіз бар.
Қазақстан Республикасының Конституциясы 1995 жылғы 30 тамызда бүкілхалықтық референдум арқылы қабылданды. Бұл күн еліміздің тарихында ерекше орын алады, өйткені сол сәттен бастап тәуелсіз Қазақстан өз дамуының жаңа кезеңіне қадам басты. Конституция мемлекеттің құрылымын, билік тармақтарының өкілеттігін, азаматтардың құқықтары мен бостандықтарын нақты айқындап берді.
Ата Заңымыздың басты қағидаты – адам мен оның өмірі, құқықтары мен бостандықтары ең жоғары құндылық болып табылады. Бұл – демократиялық қоғамның басты өлшемі. Конституция әрбір азаматқа тең мүмкіндік беріп, заң үстемдігін қамтамасыз етеді. Сондықтан оны сақтау – тек мемлекеттік органдардың ғана емес, әрбір қазақстандықтың қасиетті борышы.
Бүгінгі таңда Конституция еліміздің саяси, әлеуметтік және экономикалық тұрақтылығының кепілі болып отыр. Мемлекеттік билік тармақтарының өзара теңгерімі, сот тәуелсіздігі, азаматтық қоғамның дамуы – мұның бәрі Ата Заңның өміршеңдігін көрсетеді.
Қоғам өзгеріп, уақыт алға жылжыған сайын Конституция да заман талабына сай жетілдіріліп келеді. Соңғы жылдары енгізілген өзгерістер мен толықтырулар – ел дамуының жаңа кезеңін айқындауға бағытталған маңызды қадамдар. Бұл – халықтың мүддесін ескерудің және демократиялық үдерістерді тереңдетудің айқын көрінісі.
Қорыта айтқанда, Конституция – елдің бірлігі мен тұрақтылығының нышаны, мемлекеттілігіміздің мызғымас негізі. Оны құрметтеу мен сақтау – әрбір азаматтың ел алдындағы парызы. Ата Заңды ардақтау арқылы біз мемлекетіміздің жарқын болашағына өз үлесімізді қосамыз.
Жалағаш аудандық сотының бас маманы Р.Аккасинов
