Әл-Фараби атындағы Қазақ ұлттық университеті азаматтық құқық және азаматтық іс жүргізу, еңбек құқығы кафедрасының студенттері әлемде кеңінен таралған әлеуметтік мәселелерді талқылауда маңызды рөл атқарып келеді. Бұл жолы оқу ордамыздың студенттері аштық мәселесін талқылап, оның себептері мен салдарын, сондай-ақ оны жеңу жолындағы шараларды қарастырды. Аштық, бүгінде әлем бойынша 800 миллионнан астам адамды қамтып отырған, өзекті әрі күрделі әлеуметтік құбылыс. Студенттер бұл мәселенің тек әлеуметтік емес, экономикалық және экологиялық аспектілерін де жан-жақты талқылап, әртүрлі шешімдер ұсынды. Кафедра студенттері аштық мәселесін шешуге бағытталған бірқатар ұсыныстар мен шаралар ұсынды. Бұл ұсыныстардың ішінде білім беру, инновациялар, жергілікті деңгейде көмек көрсету және халықаралық ынтымақтастықты нығайту сияқты бірнеше маңызды аспектілер қарастырылды.Білім алушылардың пікірінше, әлемдегі барлық елдерге азық-түлік қауіпсіздігін қамтамасыз ету қажет. Бұл үшін ауыл шаруашылығындағы жаңа технологияларды енгізу, жергілікті өндірісті дамыту және азық-түлік өнімдерін тиімді пайдалану шаралары қолға алынуы тиіс. Ауыл шаруашылығының тиімділігін арттыру үшін жасыл технологиялар мен инновациялық шешімдерді енгізуді ұсынды.
Аштық тек физикалық әлсіздікке әкеліп қоймай, халықтың жалпы дамуына кері әсерін тигізеді. Тамақтың жетіспеушілігі балалардың өсіп-өнуіне, олардың білім алуға деген мүмкіндіктеріне және жалпы қоғамның болашағына қауіп төндіреді. әкелді. Осы тұста ЮНИСЕФ өкілдерінің айтқаны бар. Былтыр дүние жүзі бойынша 36 жарым миллион бала үй күйсіз қалған. Оның 13 миллион 700 мыңы шет елге босып кетсе, қалғаны өз елінде тентіреп жүр. Бұл Екінші дүниежүзілік соғыстан кейін тіркелген ең жоғары көрсеткіш дейді мамандар. Сарапшылар сондай-ақ соңғы 10 жылда әлемдегі босқындар саны 2 есе артқанын айтады. Оның тең жартысы бала. Мұндай мәселе туындағанда алдымен себебін анықтап, сосын шара қолданатынымыз бар. Сондықтан аштықтың таралу себебін іздейтініміз белгілі. Әлемде болып жатқан қақтығыстар, экономикалық қиындықтар, климаттың өзгеруі мен пандемия салдары жүз мыңдаған адамның аяқ-қолына тұсау салды.
Оқу ордамыздың студенттері аштық мәселесін шешуде жастардың рөлі үлкен екендігін атап өтті. Жастардың қолынан инновациялық шешімдер мен технологияларды енгізу келетінін ескерсек, олар аштық мәселесін шешуге белсенді түрде атсалыса алады. Қазіргі таңда көптеген жастар әлеуметтік кәсіпкерлікпен айналысып, әлемдік деңгейде адам құқықтары мен әлеуметтік әділеттілік мәселелерін көтеруде. ҚазҰУ студенттері де бұл бағытта өздерінің идеялары мен жобаларын ұсынуға дайын екендігін білдірді.
Нурахметова Г.Г.
әл-Фараби атындағы ҚазҰУ-дың заң факультеті азаматтық құқық және азаматтық іс жүргізу, еңбек құқығы кафедрасының з.ғ.к., доцент
