Қазақстанның кейбір өңірінде бензин бағасы қымбаттайды, деп хабарлайды Stan.kz ақпарат агенттігі.
Энергетика министрлігі бағаны мемлекеттік реттеуге жататын мұнай өнімдерін бөлшек саудада өткізудің шекті бағасына өзгерістер енгізетін бұйрық жобасын дайындады.
Осылайша, АИ-92 және АИ-93 бензиніне шекті баға белгілеу жоспарлануда:
— Қостанай, Солтүстік Қазақстан облыстарында – литріне 187 теңге;
— Нұр-Сұлтан, Алматы, Шымкент қалаларында, Ақмола, Ақтөбе, Шығыс Қазақстан, Батыс Қазақстан, Алматы, Атырау, Жамбыл, Қарағанды, Қызылорда, Павлодар, Түркістан, Маңғыстау облыстарында, сондай-ақ Абай, Жетісу облыстарында , Ұлытауда – литрі 182 теңге.
Қазір еліміздің барлық өңірлерінде аталған маркадағы бензиннің шекті бағасы 182 теңге болып белгіленген.
Энергетика министрлігі түсіндіргендей, Қостанай және Солтүстік Қазақстан облыстары үшін АИ-92 және АИ-93 маркалы бензиннің литріне бағаны 5 теңгеге көтеру ұсынылып отыр, себебі ол жерде операциялық (логистикалық) шығындар деңгейі жоғары. Қазақстанның басқа аймақтарына қарағанда мұнай өнімдерін өндіруші зауыттардан бөлшек сауда орындарының қашықтығымен байланысты.
Мұндай бағалар 180 күнтізбелік күнге белгіленеді деп жоспарлануда.
Дизель отынының бағасы (жазғы, маусымаралық) өзгеріссіз қалады, жаңа бағыттар қосылды:
— Ақмола, Ақтөбе, Шығыс Қазақстан, Батыс Қазақстан, Қостанай, Солтүстік Қазақстан облыстарында, сондай-ақ Абай облысында литріне 260 теңге;
— Нұр-Сұлтан, Алматы, Шымкент қалаларында, Алматы, Атырау, Жамбыл, Қарағанды, Қызылорда, Павлодар, Түркістан, Маңғыстау облыстарында, сондай-ақ Жетісу, Ұлытау облыстарында литрі 230 теңгеден.
Бұл ретте АИ-95 маркалы бензинді 180 күнге мемлекеттік баға реттеуі белгіленген мұнай өнімдерінің тізбесінен оның Қазақстанда өндірілетін автобензиннің жалпы пулындағы үлес салмағына сәйкес келмейтіндігіне байланысты алып тастау ұсынылады.