Бұған дейін Астана әуежайына жаңадан келген басшылықтың төрт жылдан бері жалға алып, ың-шыңсыз кәсібін жүргізіп келе жатқан «Сервис-АСТ» компаниясына заңсыз қысым жасағаны туралы және бүгінге дейін жалға алу тәртібін бұзбай, клиенттерге сапалы қызмет көрсеткен ақша айырбастау пунктін тартып алуды көздегенін тәптіштеп жазған едік.
Әуежай әкімдігінің аяқасты жалға беру шартын бұзу әрекетіне қарсы шыққан «Сервис-АСТ» ЖШС істі сотқа жеткізіп, оң шешілген. Бірақ әуежай басшылығы «әкімшілікке қажет» деп ақша айырбастау пункті жайғасқан орынның бірін кері қайтарып алса, екіншісіне басқа кәсіп иесін жайғастыруды көздейді. Яғни, бұл орынға таласқа түскен «Байлық-финанс» ЖШС да бәсекелес ретінде іске араласа бастайды. Бұған үзілді-кесілді келіспеген компания апелляциялық шағым түсірген болатын.
Өткен аптада Астана қалалық сотында жалғасын тапқан отырыста судья тараптарға медиациялық келісімге келуге шақырып, бір апта уақыт берген-ді. 5 қараша күні сот жарыссөзге орын беріп, тараптар өз уәжін алға тартты. Апелляциялық сот шешімі бойынша алты айға созылған істе кәсіпкер Айнұр Рахимованың әділдікке қол жеткізгені мәлім болды.
«Сервис-АСТ» компаниясының мүддесін қорғаушы заңгер Алма Мусина бізге берген жауабында: «Компания 4 жылдан бері жұмыс істеп келген ақша айырбастау пунктінің біріншісін әуежай өз мұқтаждығына алған болатын. Біз екінші касса бойынша шағым түсірген едік. Енді сол пункт өзімізде қалады. Апелляциялық сот алқасы «Байлық-финанс» ЖШС мен Астана қаласының халықаралық әуежайы түсірген шағымды қарап, қанағаттандырусыз қалдырды. Яғни, Астана қаласының экономикалық сотының шешімі өзгеріссіз қалды. Демек, «Сервис-АСТ» компаниясы өзінің бұрынғы орнында жұмысын жалғастыра береді және үш жыл мерзімге жалға алу үшін келісім-шартқа қойылатын болды. Апелляциялық сот нүктесін қойған үкім бүгіннен бастап күшіне енеді», – деді.
