Қазақстан Республикасының халықаралық міндеттемелерін іске асыру аясында ресми құжаттарды шет мемлекеттерде тану мәселесі өзекті болып қала беруде. Осыған байланысты апостиль қою рәсімі азаматтар мен заңды тұлғалар үшін маңызды құқықтық тетік болып табылады.
Апостиль – 1961 жылғы 5 қазандағы Гаага конвенциясына қатысушы мемлекеттер арасында ресми құжаттардың түпнұсқалығын растайтын арнайы белгі. Қазақстан Республикасы аталған Конвенцияға қатысушы мемлекет болғандықтан, елімізде берілген құжаттарға апостиль қою арқылы оларды шет мемлекеттердің аумағында қосымша консулдық заңдастырусыз пайдалануға мүмкіндік бар.
Қолданыстағы заңнамаға сәйкес апостиль азаматтық хал актілері туралы құжаттарға, білім беру туралы құжаттарға, нотариаттық куәландырылған құжаттарға, сондай-ақ сот актілеріне қойылады. Әрбір құжат түрі бойынша апостиль қоюға уәкілетті мемлекеттік орган белгіленген.
Апостиль қою кезінде құжаттың мазмұны қаралмайтынын, тек оны берген органның өкілеттілігі, лауазымды тұлғаның қолының түпнұсқалығы және мөр-таңбаның заңдылығы тексерілетінін ескеру қажет. Осыған байланысты құжаттар белгіленген талаптарға сай ресімделуі тиіс.
Тәжірибе көрсеткендей, кейбір жағдайларда құжаттағы техникалық кемшіліктер, талапқа сай емес түзетулер немесе құжаттың түпнұсқа болмауы апостиль қоюдан бас тартуға негіз болуы мүмкін. Осы себепті азаматтарға құжаттарын уәкілетті органға ұсынар алдында мұқият тексеру ұсынылады.
Апостиль қою рәсімі халықаралық құжат айналымын жеңілдетуге және азаматтардың құқықтарын тиімді іске асыруға бағытталған. Осы орайда мемлекеттік органдар тарапынан түсіндіру жұмыстары тұрақты түрде жүргізіліп, азаматтарға құқықтық көмек көрсетілуде.
Ғ.Сахи, Жалағаш аудандық соты
әкімшісінің бас маманы
