«Ана тілің – арың бұл» деген қанатты сөздің мәні терең. Ана тілі – әрбір адамның болмысы мен рухани дүниесінің негізі, ұлттық бірегейліктің басты белгісі. Тіл – ұлттың жаны, тарихы, мәдениеті мен дәстүрін ұрпақтан ұрпаққа жеткізетін ең қастерлі құндылық.
Қазақстан Республикасының Конституциясына сәйкес мемлекеттік тіл – қазақ тілі. Мемлекеттік тілдің қолданылу аясын кеңейту, оның мәртебесін көтеру – әрбір азаматтың ортақ міндеті. Мемлекеттік қызметте, оның ішінде сот жүйесінде де мемлекеттік тілдің қолданысын арттыру заң үстемдігін нығайтып, азаматтардың құқықтарын тиімді қорғауға ықпал етеді.
Сот төрелігінің басты қағидаты – әділдік пен заңдылық. Азаматтардың сотқа деген сенімі тек қабылданған шешімдердің әділдігімен ғана емес, олардың өз ана тілінде еркін сөйлеп, ойын толық жеткізе алуымен де өлшенеді. Сондықтан соттарда мемлекеттік тілдің қолданылуы азаматтардың конституциялық құқықтарын қамтамасыз етудің маңызды кепілі болып табылады.
Сот жүйесінде мемлекеттік тілде іс жүргізу деңгейі жылдан-жылға артып келеді. Судьялар мен сот қызметкерлері мемлекеттік тілді кәсіби деңгейде меңгеріп, ресми құжаттарды қазақ тілінде сапалы әзірлеуге ерекше көңіл бөлуде. Бұл – заң талаптарын орындаумен қатар, мемлекеттік тілге деген құрметтің айқын көрінісі.
Ана тілін құрметтеу – өткенге тағзым ғана емес, болашаққа деген жауапкершілік. Өз тілін қадірлеген халықтың рухы биік, бірлігі бекем болады. Әрбір азамат мемлекеттік тілді меңгеруге, оны күнделікті өмірде кеңінен қолдануға ұмтылғанда ғана еліміздің тұтастығы мен тәуелсіздігі нығая түседі.
Ұлы ағартушы Ахмет Байтұрсынұлы: «Тілі жоғалған жұрттың өзі де жоғалады» деген болатын. Сондықтан ана тілімізді сақтау, дамыту және келер ұрпаққа аманат ету – баршамыздың қасиетті парызымыз.
Ана тілі – ар-намысымыздың айнасы, елдігіміздің белгісі. Тілімізді құрметтеу – мемлекетімізді құрметтеу. Әрбір азамат мемлекеттік тілдің мәртебесін көтеруге өз үлесін қосса, Қазақстанның жарқын болашағына қызмет еткен боламыз.
Хайруллина Ульяна Ерлановна, Батыс Қазақстан облысының мамандандырылған ауданаралық экономикалық сотының судьясы
