Алматылықтар биылғы күзде суық ерте түскеніне шағымданып жатыр. Қала әкімдігі жылу беру маусымы қашан басталатынын айтты, — деп хабарлайды Tengrinews.kz тілшісі.
Алматы әкімдігінің баспасөз қызметі мәліметінше, бес күн бойына мегаполисте орташа тәуліктік температура плюс 8 градус Цельсий және одан төмен тұрақты болған кезде жылумен жабдықтауға кезең-кезеңімен қосылу басталады.
Сондай-ақ, ведомствода жылу маусымына дайындық және оны өткізу қағидаларына сәйкес, Алматы қаласындағы нысандарды кезең-кезеңімен қосу уәкілетті органның қаулысы негізінде басталатынын айтты.
«Тұтынушылар жылумен жабдықтауға келесі ретпен қосылады:
- балалар, емдеу, мектеп мекемелері, кәсіптік мектептер, медициналық-әлеуметтік мекемелер;
- тұрғын үйлер, жатақханалар, қонақүйлер;
- әкімшілік ғимараттар, оқу орындары, театрлар;
- басқа ғимараттар», — деп бөлісті мегаполис әкімдігі.
Жылыту маусымының нақты басталу күні әлі белгіленбеген, ол ауа райы жағдайларына және уәкілетті органның шешіміне байланысты болады.
