Алматыда жалпы сомасы 550 мың доллар және 26 910 еуро болатын қаражатты шетелге заңсыз шығару әрекеті анықталды, — деп хабарлайды Tengrinews.kz тілшісі Қаржы мониторингі агенттігіне сілтеме жасап.
«2022 жылдың басынан бері Алматы қаласының халықаралық әуежайында жалпы сомасы 550 мың АҚШ доллары және 26 910 еуро болатын қаражатты декларациядан өткізбей шығарудың 2 дерегі және 20 әкімшілік факт анықталды», — делінген хабарламада.
ҚМА мәліметінше, бұл бағытта жұмыстар жалғасып жатыр.
Сондай-ақ, ҚМА шетелдік валютадағы қолма-қол ақша және ақша құралдары 10 000 АҚШ доллары баламасынан аспауы керек екенін еске алды.
ҚМА мәліметіне сүйенсек, Қазақстан Республикасы заңнамасы талаптарын бұзғаны үшін әкімшілік және қылмыстық жауапкершілік қарастырылған. Сондай-ақ, сот шешімі бойынша ақша мен тауарлар мемлекет пайдасына тәркіленуі мүмкін.
