Алматының бас мемлекеттік санитар дәрігері демалыс күндері қоғамдық көлік қозғалысы мен метро қызметін шектеу себебін түсіндірді және Наурыз мейрамында автобустар қалай жұмыс істейтінін айтты, — деп хабарлайды Tengrinews.kz тілшісі.
Онлайн брифингте журналист Жандарбек Бекшиннен демалыс күндері қоғамдық көліктер қозғалысы мен метро қызметі неге тоқтатылғанын сұрады.
«Бұл жалпы қабылданған шара, автобустарда адамдар көп шоғырланады. Қоғамдық көлік — инфекция ошағының бірі. Науқастардың 17,5 пайызы коронавирус инфекциясын жұқтыру себебін қоғамдық көлікпен байланыстырады. Қазір біз инфекцияның таралуын азайтуымыз керек.
Екі күнде нәтиже болды. Жұмада 360 науқас анықталса, сенбіде — 342, жексенбіде — 297. Бұл кешенді шаралар коронавирус инфекциясының таралмауына әсер етті. Бірақ, қоғамдық көлік жұмысын шектеу де маңызды рөл атқарады», — деді ол.
«Демалыс және мереке күндері қоғамдық көлік тоқтайды және бұл қала «қызыл» аймақтан шыққанға дейін болады», — деп қосты ол.
Айта кетейік, Алматыда демалыс күндері қоғамдық көлік қозғалысы мен метро қызметі тоқтайтыны хабарланған еді.
