Алматыда ескі көліктердің қозғалысын шектеуі мүмкін. Мұндай ұсыныс қаладағы атмосфералық ауаның сапасын жақсарту мәселесіне арналған қоғамдық кеңестің отырысында айтылды, — деп хабарлайды Tengrinews.kz тілшісі.
Кездесудің басты тақырыбы – қоғамды ауа сапасын жақсартуға бағытталған шешімдерге тарту болды. Сонымен қатар, қала тұрғындарының экологиялық проблемалар туралы хабардарлығын арттыру және оларды шешу жолдары талқыланған.
2024 жылғы зерттеу деректері бойынша, Алматыдағы ауаны негізгі ластаушы – автокөлік, оның үлесі жалпы шығарындылардың 60 пайызы болады. Жылына 189 мың тонна ластаушы заттардың 112 мың тоннасы автокөліктер, 52 мың тоннасы өнеркәсіптік кәсіпорындар, ал қалған бөлігі жеке үйлер мен шағын бизнестің үлесіне келеді.
Almaty Air Initiative қорының жобалар менеджері Равкат Мұхтаровтың айтуынша, Алматыдағы ластаушы заттардың деңгейі рұқсат етілген нормадан орта есеппен 4,8 есеге жоғары.
Көлік инфрақұрылымы жөніндегі сарапшы Елена Ерзакович қоғамдық көлікті дамыту жұмыстарын күшейту қажеттігін айтты. Атап айтқанда, автобус жолақтарын көбейту және төмен шығарындылы аймақтарын енгізу маңызды. Сондай-ақ, автотұрақ кеңістігін дамыту ауа сапасын жақсартуға ықпал ететінін айтты.
Алматы мәслихатының депутаты Бейбіт Әпсенбетов «ауа мәселесі – өмірлік мәселе» екенін, сондықтан қала билігі қала жолдарындағы ескі көліктердің санын қысқарту бойынша кешенді шараларды шұғыл түрде жүзеге асыруға кірісуі керек екенін айтты.
Отырыстың қорытындысы бойынша мынадай шаралар ұсынылды:
- Евро 0–4 экологиялық санаттағы автокөліктерді пайдалануды шектей отырып, төмен шығарындылы аймақтарды құру;
- Қоршаған ортаға әсеріне қарай экологиялық таза аймақтарға кіруге ақы енгізу;
- Қатты отынмен жұмыс істейтін қоғамдық тамақтану орындарында су сүзгілерін орнату талаптарын қатаңдату;
- Жеке тұрғын үйлерді газдандыруды аяқтап, 86 қоғамдық және 12 316 жеке моншаны газға көшіру;
- Көліктердің техникалық байқау бекеттеріне бақылауды күшейту. Қазіргі уақытта Алматыда 138 техникалық байқау бекеті бар, олардың 80-ге жуығы заң талаптарына сай келмейді.
Сонымен қатар, III және IV санаттағы өнеркәсіптік нысандарға қосымша экологиялық талаптар енгізу ұсынылды.
