Алматы қаласы Кәсіпкерлік басқармасының басшысы Еркебұлан Оразалин алдағы айларда қалада қандай көкөніс бағасы төмендейтінін айтты, — деп хабарлайды Tengrinews.kz тілшісі.
Басқарма басшысы маусымаралық кезеңнен кейін көптеген көкөністердің бағасы тұрақталатынын айтты. Мамыр айында қырыққабат пен пияздың бағасы төмендейді, ал картоп пен сәбіз бағасы маусым айында тұрақталады.
Сондай-ақ, Түркістан облысының өндірушілерімен ерте пісетін қырыққабатты жеткізу бойынша келіссөз жүргізілген, бірінші партия қала сөрелеріне келіп түскен. Мамыр айынан тамыз айының соңына дейін 7 мың тоннадан астам картоп, пияз және сәбіз жеткізіледі. Шілде айынан бастап Алматы облысынан 3,5 мың тонна көкөніс (картоп, сәбіз, пияз, қырыққабат) жеткізу жоспарланып отыр.
«Қырыққабат жеткізу бойынша Түркістан облысымен келісімшарт жасалғанын растаймыз. Өткен аптада алғашқы жеткізілімдер көтерме бағамен 180 теңгеден келді. Қазір қырыққабаттың келісі 240 теңгеден сатылып жатыр. Апта соңына дейін 230 теңгеге төмендейді. Келесі жылдың соңына қарай қырыққабаттың бір келісі 165 теңгеге жетеді деп күтеміз», — деді кәсіпкерлік бөлімінің басшысы.
Еркебұлан Оразалин қырыққабат бағасы 300-400 теңгеден 165 теңгеге дейін төмендейтінін атап өтті. Пияз бағасы да 50 пайызға арзандауы мүмкін. Картоп пен сәбіз маусым айынан бастап 50 пайызға немесе одан да төмен түсе бастайды. Басқарма басшысының айтуынша жаз айларында көптеген өнімдердің бағасы төмендейді.
Көкөніс өнімдерінің қымбаттауын тежеу үшін күзден бастап ірі сауда желілеріне жеткізу бойынша келісімшарттар жасалады. Мысалы, Magnum желісіне төрт түрлі көкөністен 17 мың тонна өнімге келісімшарт жасалды. Сондай-ақ Павлодар және Алматы облыстарынан 7 мың тонна және 5 мың тонна көкөніс жеткізіледі.
Сондай-ақ, кәсіпкерлік бөлімінің басшысы әлеуметтік маңызы бар өнім санатына енетін ет бағасы жыл басынан бері келісі 2050 теңгеден 2250 теңгеге дейін көтерілгенін айтты. Бұл жем бағасының өсуіне байланысты. Бұл бағаны күзге дейін сақтау жоспарланып жатыр.
