Алматы қаласында тұрғындардың қауіпсіздігін қамтамасыз етуге бағытталған «Қауіпсіз ел» жобасы кезең-кезеңімен жүзеге асырылып жатыр. Жоба аясында қоғамдық қауіпсіздікті күшейту, төтенше жағдайлардың алдын алу, жол-көлік оқиғаларын азайту және цифрлық бақылау жүйелерін жетілдіру бағытында ауқымды жұмыстар қолға алынған.
Бүгінде мегаполисте бейнебақылау камераларының саны артып, «Сергек» интеллектуалды жүйесінің мүмкіндігі кеңейтілуде. Бұл өз кезегінде құқық бұзушылықтарды жедел анықтауға, жол қозғалысын бақылауға және қоғамдық тәртіпті сақтауға мүмкіндік береді. Қаладағы адам көп жиналатын орындар, әлеуметтік нысандар мен көшелер тәулік бойы бақылауға алынған.
Сонымен қатар, Алматыда сейсмикалық қауіпсіздік мәселесіне де ерекше назар аударылып отыр. Қалада тұрақты түрде жалпықалалық сейсмикалық жаттығулар өткізіліп, тұрғындарға төтенше жағдайда әрекет ету жолдары түсіндірілуде. Биыл мамыр айында қала бойынша сиреналық хабарлау жүйелері тексеріліп, мобильді қосымшалар мен телеарналар арқылы ескерту жүйесі іске қосылды.
Мамандардың айтуынша, «Қауіпсіз ел» жобасының басты мақсаты – қауіптің алдын алу мәдениетін қалыптастыру. Осыған байланысты мектептерде, колледждерде және жоғары оқу орындарында қауіпсіздік сабақтары ұйымдастырылып, тұрғындарға арналған түсіндіру жұмыстары жүргізілуде.
Жоба аясында өрт қауіпсіздігіне де ерекше көңіл бөлінуде. Қаладағы көпқабатты үйлер мен сауда орталықтарында эвакуациялық жаттығулар өткізіліп, өрт сөндіру жүйелерінің дайындығы тексеріледі. Сонымен бірге коммуналдық инфрақұрылым мен қоғамдық көлік нысандарында да қауіпсіздік талаптары күшейтілген.
Алматы әкімдігі цифрлық технологияларды енгізу арқылы «ақылды қала» жүйесін дамытуға басымдық беріп отыр. Бұл бағытта қоғамдық орындардағы бақылау, жедел әрекет ету қызметтері мен тұрғындардан келіп түсетін өтініштерді жедел қарау жұмыстары бір орталыққа біріктірілуде.
Сарапшылардың пікірінше, қауіпсіздік тек құқық қорғау органдарының жұмысына ғана байланысты емес. Тұрғындардың жауапкершілігі, қоғамдық тәртіпке бейжай қарамауы және төтенше жағдай кезіндегі сауаттылығы да маңызды рөл атқарады.
Жалпы, Алматыда жүзеге асырылып жатқан «Қауіпсіз ел» жобасы қала тұрғындары үшін қолайлы әрі қауіпсіз орта қалыптастыруға бағытталған маңызды бастамалардың бірі болып саналады. Қазіргі таңда шара аясында өтіп жатқан шаралар еліміздегі қауіпсіздік, ұлт қауіпсіздігі ұғымдарының маңыздылығын ұғындырып отыр.
Айжан Қали
