Алматы қаласында қоғамдық тәртіпті сақтау мен құқық бұзушылықтың алдын алу бағытында «нөлдік төзімділік» қағидасы жүйелі түрде жүзеге асырылып келеді. Бұл бастама ұсақ құқық бұзушылықтарға бейжай қарамау арқылы қоғамда заңға құрмет мәдениетін қалыптастыруды көздейді.
Сарапшылардың айтуынша, қоғамдық орындардағы тәртіпсіздік, вандализм, қоқыс тастау, тыныштықты бұзу, жол ережесін сақтамау секілді ұсақ құқық бұзушылықтарға дер кезінде шара қолдану – ірі құқық бұзушылықтардың алдын алудың тиімді жолы. Сондықтан Алматыда соңғы жылдары профилактикалық жұмыстар мен бақылау күшейтілді.
Қалада полиция қызметкерлері мен жергілікті атқарушы органдар қоғамдық орындарда тұрақты рейдтер ұйымдастырып келеді. Әсіресе саябақтарда, жаяу жүргіншілер аймақтарында, аулаларда және халық көп шоғырланатын орындарда тазалық сақтау, қоғамдық тәртіпті бұзбау және заң талаптарын орындау мәселесіне ерекше назар аударылуда.
«Нөлдік төзімділік» қағидасы тек жазалау шарасымен шектелмейді. Оның негізгі мақсаты – тұрғындардың құқықтық санасын қалыптастыру және азаматтық жауапкершілікті арттыру. Осыған байланысты мектептерде, колледждерде және жоғары оқу орындарында құқықтық түсіндіру кездесулері өткізіліп, жастарға қоғамдық тәртіптің маңызы түсіндірілуде.
Алматыда цифрлық бақылау жүйелері де қоғамдық қауіпсіздікті қамтамасыз етуге көмектесіп отыр. Қала көшелеріндегі бейнебақылау камералары мен интеллектуалды жүйелер құқық бұзушылықтарды жедел анықтап, тәртіп сақшыларының жұмысын тиімді етуге мүмкіндік береді.
Мамандардың пікірінше, қоғамдағы тазалық пен тәртіп мәдениеті әр азаматтың жауапкершілігінен басталады. Мәселен, көшеге қоқыс тастамау, қоғамдық орындарда әдеп сақтау, жол ережесін орындау секілді қарапайым талаптардың өзі қала мәдениетінің деңгейін көрсетеді.
Сондай-ақ қалада вандализмге қарсы күрес те күшейтілген. Соңғы уақытта аялдамаларды бүлдіру, қабырғаларға заңсыз жазу жазу, қоғамдық мүлікті сындыру деректеріне қатысты бақылау қатаңдатылып, кінәлілер жауапкершілікке тартылуда.
Құқық қорғау органдарының мәліметінше, тұрғындардың қоғамдық тәртіпке бейжай қарамауы да оң нәтиже беріп келеді. Қала тұрғындары құқық бұзушылық фактілері туралы жедел хабарлап, қауіпсіз орта қалыптастыруға атсалысуда.
Жалпы, Алматыда жүзеге асырылып жатқан «нөлдік төзімділік» қағидасы қоғамдық тәртіпті нығайтуға, тұрғындардың құқықтық мәдениетін арттыруға және қауіпсіз әрі жайлы қала ортасын қалыптастыруға бағытталған маңызды бастамалардың бірі болып отыр.
Мәдина Қали
