Қазақстан Республикасы Мемлекеттік қызмет істері агенттігінің Алматы қаласы бойынша департаменті жанындағы Мемлекеттік қызметтер көрсету мәселелері жөніндегі ведомствоаралық жұмыс тобы (ВАЖТ) көшпелі отырыс өткізді.
Жиында автокөлік жүргізушілеріне арналған мамандандырылған халыққа қызмет көрсету орталықтарындағы қызмет сапасы, азаматтардың шағымдары және оларды шешу жолдары талқыланды. Отырысқа Алматы қаласы бойынша Мемлекеттік көрсетілетін қызметтер басқармасының басқарма басшысы Мақсат Жанбыршиев, жұмыс тобының төрағасы, департамент басшысының орынбасары Нұржан Узбеханов және және ВАЖТ мүшелері қатысты.
Кездесу барысында «Азаматтарға арналған үкімет» мемлекеттік корпорациясының Алматы қаласы бойынша филиалы ұсынған ақпарат қаралып, қызмет көрсету кезінде туындайтын бірқатар жүйелі мәселелер анықталды. Атап айтқанда, жүргізуші куәлігін алу кезінде азаматтардың ұзақ кезекте тұруы, емтихан процесінің жеткілікті деңгейде ұйымдастырылмауы және қызмет көрсету тәртібіне қатысты шағымдардың жиі түсетіні туралы мәселелер сөз болды.
Жұмыс тобының қорытындысы бойынша теориялық емтихан тапсыратын компьютерлер санын көбейту, қосымша оқу сыныптарын ашу және практикалық емтиханға жазылудың тиімді жүйесін енгізу секілді бірнеше ұсыныс қабылданды. Мүмкіндігі шектеулі азаматтарға қолайлы жағдай жасау мәселесі де назардан тыс қалмады. Мәселен, мамандандырылған ХҚКО №4 бөлімінде анықталған кемшіліктерді жою және мүгедектігі бар азаматтарға қажетті инфрақұрылымды қамтамасыз етуді қарастыру қажет екені айтылды.
Жиын қорытындысы бойынша ВАЖТ «Азаматтарға арналған үкімет» мемлекеттік корпорациясының Алматы қаласы бойынша филиалына ақпараттық-түсіндіру жұмыстарын күшейту, теориялық емтихан тапсыратын компьютерлер санын арттыру, мамандандырылған ХҚКО-ларда медициналық тексеру мекемелерінің санын көбейту мүмкіндігін қарастыру жөнінде нақты ұсыныстар берді.
Мамандардың айтуынша, бұл шаралар мамандандырылған ХҚКО-ларда көрсетілетін мемлекеттік қызметтердің сапасын арттыруға ықпал етеді.
