Абай атындағы Қазақ Ұлттық опера және балет театрына Қазақстанның Халық жазушысы, Еңбек ері, көрнекті ақын, қоғам қайраткері Мұхтар Шахановпен қоштасуға халық өте көп жиналды, – деп хабарлайды aqshamnews.kz тілшісі.
Қаралы жиында мемлекет басшысы Қасым-Жомарт Тоқаевтың көңіл айту хатын ҚР Парламенті Сенатының төрағасы Мәулен Әшімбаев оқып берді. Мәжіліс төрағасы Ерлан Қошановтың көңіл айту хатын депутат Жанарбек Әшімжан жеткізді.
Қоштасуға келгендер қатарында Премьер-министрдің орынбасары – мәдениет және ақпарат министрі Аида Балаева, Алматы қаласының әкімі Дархан Сатыбалды және зиялы қауым өкілдері бар. Қоштасу жиынын Қазақстан Жазушылар одағының Басқарма Төрағасы Мереке Құлкенов жүргізді.
Азулы ақынмен қоштасуға келгендердің арасында Димаш Құдайберген мен Қайрат Нұртас та бар.
Мұхтар Шаханов Арыстан баб кесенесінің маңындағы Қоғам ауылдық зиратына жерленетін болды. Бұл ақпаратты ақынның немересі Қайырхан Балғабеков растады.
Фото: aqshamnews.kz
