2025 жылғы 28 наурызында Алматы қаласында Әдеп жөніндегі кеңестің кезекті отырысы өтті. Онда мемлекеттік қызмет көрсету сапасы, тәртіптік тәжірибе, сыбайлас жемқорлықтың алдын алу және тәртіптік істер қаралды.
Алғашқы мәселе ретінде 2024 жылы Алматы қаласы жергілікті және аумақтық мемлекеттік органдардың мемлекеттік қызмет көрсету сапасы бойынша жүргізілген талдау нәтижелері қарастырылды. Бұл талдауды Мемлекеттік қызмет істері агенттігінің Алматы қаласы бойынша департаментінің бас маманы Асем Рахымовна Масимханова ұсынды. Талдау қорытындысы бойынша мемлекеттік қызмет сапасын арттыруға бағытталған бірқатар шаралар белгіленіп, кейбір мәселелердің шешілу жолдары талқыланды.
Сонымен қатар, 2024 жылғы тәртіптік тәжірибе қорытындылары негізінде Алматы қаласы әкімі аппаратының Бірыңғай тәртіптік комиссиясы мен аумақтық мемлекеттік органдардың тәртіптік комиссияларының қызметі сарапталды. Бұл тақырып бойынша баяндама жасаған Мемлекеттік қызмет істері агенттігінің Алматы қаласы бойынша департаментінің бас маманы Лаура Нұргелдіқызы Науқанбай мемлекеттік қызметшілердің тәртіптік жауапкершілігіне қатысты негізгі мәселелерді баяндап, оларды шешу үшін ұсыныстар жасады.
Алматы қаласы білім басқармасының мемлекеттік қызмет және сыбайлас жемқорлыққа қарсы іс-қимыл туралы заңнаманы бұзушылықтардың профилактикасы бойынша атқарған жұмыстары да күн тәртібінде қаралды. Бұл мәселе бойынша баяндама жасаған Алматы қаласы білім басқармасы басшысының орынбасары Сайлаубай Айдын Сайлаубайұлы атқарылған жұмыстардың нәтижелерін баяндап, алдын алу шараларының маңыздылығын атап өтті.
Отырыс барысында сондай-ақ Алматы қаласы Қалалық жоспарлау және урбанистика басқармасының лауазымды тұлғасына қатысты жүргізілген тәртіптік іс қаралды. Бұл мәселе бойынша нақты шешімдер қабылданды.
Жиын қорытындысы бойынша мемлекеттік қызмет сапасын арттыру, заң бұзушылықтардың алдын алу және тәртіптік комиссиялардың жұмысын жетілдіру бағытында бірқатар ұсыныстар енгізілді. Алматы қаласының мемлекеттік органдары алдағы уақытта осы бағыттағы жұмыстарды жалғастырып, тұрғындарға сапалы қызмет көрсетуді басты назарда ұстайтын болады.
Мемлекеттік қызмет істері Агенттігінің Алматы қаласы бойынша Департаментінің басқарма басшысы Н. Узбеханов
