Қуандық Бишімбаевтың адвокаты үкімге апелляциялық шағым түсірді, — деп хабарлайды Tengrinews.kz тілшісі.
Бишімбаевтың адвокаты Ерлан Ғазымжановтың айтуынша, ол сотқа 28 мамырда шағымын жолдаған.
«Сағат 17:00-де мен Бишімбаевқа қатысты сот үкіміне қарсы сот кабинеті арқылы аппеляциялық шағым түсірдім», — деді Tengrinews.kz тілшісіне Бишімбаевтың қорғаушысы.
Адвокат Ерлан Ғазымжановтың айтуынша, апелляцияда 20-ға жуық процессуалдық заңбұзушылықтар көрсетілген. Бишімбаевтың қорғаушысының пікірінше, сот талқылауы барысында судья тарапынан заңбұзушылқтарға жол берілген.
«Бұл, біздің ойымызша, алқабилер үкімі мен үкімнің заңсыз болуына әкелді. Бүгін тергеу изоляторында болдым, қорғауымдағы Қуандыққа шағым жобасын көрсеттім, ол келісіліп, соңғы нұсқасын сотқа жібердім», — деді Бишімбаевтың адвокаты.
