Қоғамның дамуы мен мемлекеттің нығаюы ең алдымен азаматтардың санасына, ұстанымына және жауапкершілігіне байланысты. Осы тұрғыдан алғанда, «Адал азамат» қағидаты – әділетті қоғам құрудың басты негіздерінің бірі. Адал азамат дегеніміз – заңды құрметтейтін, еңбекке адал, қоғам мүддесін жеке бастың пайдасынан жоғары қоятын, ел болашағына жауапкершілікпен қарайтын тұлға.
Адалдық – адам бойындағы ең асыл қасиеттердің бірі. Ол шындықты ту ету, әділ болу, уәдеге беріктік таныту, жемқорлық пен әділетсіздікке қарсы тұру сияқты ұғымдармен астасып жатыр. Адал азамат өз ісіне жауапкершілікпен қарап, әрбір әрекетінде тазалық пен шынайылықты басшылыққа алады. Мұндай қағида қоғамда сенім қалыптастырады.
Бүгінде «Адал азамат» ұғымы тек жеке адамның мінез-құлқын ғана емес, тұтас қоғамдық мәдениетті білдіреді. Бұл – заң мен тәртіпті сақтау, қоғамдық орындарда мәдениетті болу, мемлекеттік мүлікке ұқыптылықпен қарау, қоршаған ортаны қорғау, салықты уақытылы төлеу, өз міндетін адал атқару сияқты күнделікті өмірдегі нақты әрекеттерден көрінеді. Себебі адалдық үлкен істерден ғана емес, қарапайым тәртіптен басталады.
Әсіресе жастар тәрбиесінде адал азамат қағидаларын орнықтырудың маңызы зор. Өскелең ұрпақ адал еңбек ету, білімге ұмтылу, Отанға қызмет ету, үлкенге құрмет, кішіге ізет көрсету сияқты құндылықтарды бойына сіңіргенде ғана елдің ертеңі берік болмақ. Адал ұрпақ – әділетті мемлекеттің кепілі.
«Адал азамат» қағидаты сыбайлас жемқорлыққа қарсы мәдениетті қалыптастырумен де тығыз байланысты. Жемқорлыққа төзбеушілік, заңсыздыққа қарсы азаматтық ұстаным таныту – қоғамдағы әділетті нығайтатын маңызды фактор. Әр адам өз саласында адал болса, қоғамда әділдік орнығып, сенім артады.
Президент ұсынған «Заң мен тәртіп» қағидаты да адал азамат ұстанымымен сабақтас. Заңды құрметтеу, тәртіпке бағыну, қоғамдық жауапкершілікті сезіну – өркениетті қоғамның белгілері. Заң үстемдік құрған жерде әділет болады, ал әділет бар жерде тұрақтылық пен даму бар.
Адал азамат болу – тек талап емес, әр адамның ішкі таңдауы. Еліміздің өркендеуі, қоғамның тазалығы, ұлттың бірлігі әр азаматтың адалдығына байланысты. Сондықтан адалдықты өмір салтына айналдыру – баршамызға ортақ міндет.
Адал азамат көп болған жерде әділет салтанат құрады, сенім бекиді, ел болашағы баянды болады. Демек, Адал азамат қағидаты – жаңа Қазақстанның берік іргетасы.
Марал Әбуова
