Қазақстанда жұмыс сапарымен жүрген Еуропа Кеңесі Венециялық комиссиясының төрайымы Клэр Бази-Малори ханым 10 қыркүйекте Абай атындағы Қазақ ұлттық педагогикалық университетінде болып, «Құқықтық диалог» халықаралық іс-шарасына қатысты. Мәртебелі мейман алқалы отырыста әлемдік деңгейдегі адам құқығына байланысты пікірілерін ортаға салып, құқықтық мемлекет құрудағы Қазақстан бастамаларына жоғары баға берді.
ҚР Президенті жанындағы Адам құқықтары жөніндегі комиссияның төрағасы Игорь Рогов «Құқықтық диалогтың» модераторы ретінде басқосуды Клэр Бази-Малориге «Қазақстан Республикасының Конституциясына 30 жыл» мерейтойлық медалін тапсырудан бастап, құрметті қонаққа деген еліміздің ыстық ықыласын жеткізді. Ал салтанатты жиынды құттықтау сөзімен ашқан Абай атындағы Қазақ ұлттық педагогикалық университетінің Басқарма төрағасы-Ректор Болат Тілеп мұндай диалогтың Қазақстан үшін аса маңызды екеніне тоқталып, адам құқықтары жөніндегі іс-шараға сәттілік тіледі.
Халықаралық шараны ҚР Президенті жанындағы Адам құқықтары жөніндегі комиссия, Абай атындағы ҚазҰПУ жанындағы Сорбонна-Қазақстан институты және Лотарингия университетінің филиалы мен Францияның Қазақстандағы Елшілігі ұйымдастырды. Диалог жұмысына ҚР Конституциялық Соты, Жоғарғы Соты, Бас прокуратурасы, Әділет министрлігі, Ішкі істер министрлігі, Парламенттің заңнама және құқықтық реформа комитеттері, ҚР Адам құқықтары жөніндегі уәкіл, ҚР СІМ Алматыдағы өкілдігі, сондай-ақ БҰҰ өкілдері, Францияның жетекші заңгерлері және еліміздің ғылыми қауымдастығы қатысты.
ҚР Әділет министрі Ерлан Сәрсембаев «Zoom» платформасы арқылы сөз сөйлеп, Қазақстанның құқықтық жүйесін дамытудағы халықаралық ынтымақтастықтың рөліне тоқталса, Францияның Қазақстандағы Төтенше және Өкілетті Елшісі Сильван Гиоге, Абай атындағы ҚазҰПУ Сорбонна-Қазақстан институтының директоры, ҚР Президенті жанындағы Адам құқықтары жөніндегі комиссия төрағасының орынбасары Айнұр Сәбитова баяндама жасады.
Қазақстанға жұмыс сапарымен келген Еуропа Кеңесінің Венециялық комиссиясының төрайымы Клэр Бази-Малори өз баяндамасында конституциялық бақылаудың заманауи тәжірибесін талдап, адам құқықтарын қорғаудағы халықаралық стандарттардың маңызына ерекше тоқталды. Оның айтуынша, Қазақстан Конституциясының 30 жылдығы тек ел үшін ғана емес, бүкіл аймақ үшін демократиялық құндылықтар мен құқықтық мемлекет қағидаттарын жаңаша түсінуге мүмкіндік беретін маңызды белес.
Елші Сильван Гиоге Қазақстан мен Франция арасындағы білім, мәдениет және құқық саласындағы ынтымақтастықты жоғары бағалап, мұндай халықаралық құқықтық диалогтың заң үстемдігін нығайтып қана қоймай, жастарға әлемдік тәжірибеден үйренуге жол ашатынын және екі елдің заң саласындағы серіктестігін одан әрі тереңдетуге ықпал ететінін атап өтті.
Жиын соңында университет студенттері халықаралық сарапшыларға көкейде жүрген сұрақтарын қойып, пікір алмасты. Осылайша, халықаралық «Құқықтық диалог» алаңы Қазақстандағы құқықтық мәдениетті нығайтып, заңнамалық құндылықтарды ілгерілетуге бағытталған маңызды бастама ретінде өз маңызын айқындады.
