Абай облысы бойынша ҚАЖ департаментінің қауіпсіздігі төмен мекемесінде сотталғандарға арналған мерекелік іс-шаралар ұйымдастырылды

Абай облысы бойынша Қылмыстық-атқару жүйесі департаментінің қауіпсіздігі төмен мекемесінде сотталған азаматтарға арналған мерекелік іс-шаралар ұйымдастырылды. Іс-шаралардың негізгі мақсаты – патриоттық тәрбие беру, рухани-адамгершілік құндылықтарды нығайту және сотталғандардың бос уақытын тиімді ұйымдастыру.
Мерекелік бағдарлама аясында концерттік қойылымдар мен спорттық жарыстар өткізілді. Сотталғандар өнер көрсету арқылы шығармашылық қабілеттерін байқап, түрлі спорттық ойындар мен командалық сайыстарға белсенді қатысты. Іс-шара қатысушыларға көтеріңкі көңіл-күй сыйлап, өзара сыйластық пен қолдау атмосферасын қалыптастырды.
Мекеме қызметкерлерінің айтуынша, мұндай мәдени және спорттық шаралар сотталғандардың тәртібін нығайтып, жауапкершілік сезімін қалыптастыруға, сондай-ақ олардың қоғамға бейімделуіне оң әсер етеді. Сонымен қатар, бұл бастамалар пайдалы бос уақытты ұйымдастырумен қатар, сотталғандардың өмірге деген көзқарасын өзгертуге, болашаққа сеніммен қарауына ықпал етеді.
Іс-шара барысында командалық рухты қалыптастыру мен психологиялық ахуалды жақсартуға ерекше көңіл бөлінді. Спорттық жарыстарда қатысушылар ептілік пен төзімділіктерін көрсетсе, концерттік бағдарлама олардың шығармашылық әлеуетін ашуға мүмкіндік берді.
Сотталғандардың бірі мұндай іс-шаралардың адамға рухани қолдау беретінін атап өтті.
— Осындай шаралар біз үшін өте маңызды. Бұл бізге уақытты текке өткізбей, өзімізді дамытуға мүмкіндік береді. Спорттық ойындар мен мәдени бағдарламаларға қатысқанда адам бойында өзгеруге деген ынта пайда болады. Мұндай сәттерде болашақ туралы, отбасың туралы ойланып, өмірге басқа көзқараспен қарай бастайсың. Бізге сенім артып, осындай іс-шаралар ұйымдастырып жүрген мекеме қызметкерлеріне алғысымыз зор, — деді сотталған азамат.
Мекеме бастығының орынбасары, әділет майоры Рүстем Берлібековтің айтуынша, мұндай іс-шаралар сотталғандардың моральдық-психологиялық жағдайына оң әсер етіп, олардың қайта әлеуметтенуіне ықпал етеді.
— Біздің негізгі мақсатымыз – сотталғандардың бос уақытын ұйымдастыру ғана емес, оларды тәрбиелеу, қоғамға бейімдеу және оң өзгерістерге ынталандыру. Мәдени және спорттық іс-шаралар арқылы олар ұжыммен қарым-қатынас орнатуды, тәртіп пен жауапкершілікті сезінуді үйренеді. Бұл — олардың түзелу жолындағы маңызды қадамдардың бірі, — деді Рүстем Берлібеков.