Биыл ұлы ақын – Абайдың туғанына 180 жыл. Ақынның халқына қалдырған мұрасы мол. Ел ішіндегі әр алуан әкімшілік-құқықтық реформаларға белсене араласқан біртуар жан ұлтқа жанашырлықтың тамаша үлгісін көрсетті. Абайдың тағылымын жастардың санасына сіңіру, ұлы тұлғаның ой-толғамдарын кеңінен дәріптеу біздің борышымыз.
Абай қазақ қоғамын ерінбей еңбек етуге шақырады. Өзінің кейбір замандастарының бойындағы жаман қасиеттерді – жалқаулықты, көрсеқызарлық пен алауыздықты, надандықты сынады.
Ұлтты құрайтын халықтың әр адамының ұлтқа қарсы айтылған кез келген кемсітушілікті және іс-әрекетті өзіне бағытталғандай қабылдауы – ұлттық намыс болып табылады. Ұлы Абайдың жан дүниесінде пайда болған бұл сезімді: «… Осы күнгілер өзге мінезге осы өрмелеп ілгері бара жатқанына қарай сол аталарымыздың екі ғана тәуір мінезін жоғалтпай тұрсақ, біз де ел қатарына кірер едік. Сол екі мінез жоқ болған соң, үйренген өнеріміздің бәрі адамшылыққа ұқсамай, шайтандыққа тартып барады. Жұрттықтан кетіп бара жатқанымыздың үлкен бір себебі сол», – деген жолдары байқатады.
Әлемде өз билігі өзінде болғанын қаламайтын бір де бір халық жоқ. Ұлттық сана-сезім мен ана тілі егіздің сыңарындай біртұтас. Әр қазақта бұл сезімнің қалыптасуы өз ұлтына деген құрметтің көрсеткіші. Ұлтын жоғалтқан әр қазақ рухани дағдарысқа ұшырап, өмірінің соңы бақытсыздыққа айналатынына Абай сенімді болды. Оның бүкіл өлеңдері, қара сөздері азаттықтың жыры. Абай – біртұтас әлем! Шынымен, Абай атамыздың мұрасында ғылым да, мәдениет те, дін де жатыр. Біз үшін бұл рухани азық.
М.КУСМАНОВА
