Meta компаниясына тиесілі Instagram мен Facebook қазақ әуендерін қашан желіге қайтаратынын ашып айтпай отыр. Әділет министрлігі келіссөздердің әлі күнге дейін жалғасып жатқанын мәлімдеді, — деп хабарлайды Massaget.kz тілшісі КТК телеарнасына сілтеме жасап.
Әділет вице-министрі Ботагөз Жақселекова келісcөздер кезінде Meta компаниясы әу бастағы келісімшарт негіздерін жария етуге құлықсыз болғанын айтып отыр. Дегенмен ортақ мәмілеге келген тұста әндер бір сағата плейлистте пайда болады.
«Қарашаның соңында барлық қазақ әні жоғалып кеткені рас. Мәдениет және ақпарат министрлігімен бірлесіп, бұл жағдай қоғамда, соның ішінде Instagram қолданушылары арасында үлкен резонанс туғызғанын ескере отырып, Meta компаниясына жүгінгенбіз. Олар келісімшарт талаптарын жариялай алмайтынын, бірақ жақын арада ортақ келісімге келеді деп үміттеніп отырғанын айтты», — деді ҚР Әділет вице-министрі Ботагөз Жақселекова.
Еске салайық, қазақ әуендерін қазақстандықтар белгілі платформадан былтыр жыл аяғында жоғалтып алады. Себеп: қазақ музыкасын халықаралық деңгейде ұсынатын авторлық қоғам Instagram, Facebook желілері кіретін Meta компаниясымен арадағы төлем мәселесі үшін келісе алмай қалған.
