28.09.2022 жылы Қызылорда облысы бойынша ҚАЖ департаментіне қарасты №37 мекемесіне Қызылорда қалалық «Құддыс — иман» мешітінің ұстазы Мұханбетғани Түлкібаев келді.
Ислам дінінің адам өміріндегі орны, түрлі діни ағымдардың идеяларынан қорғану және дәстүрлі дінді насихаттауды мақсат еткен кездесуге мекемедегі жазасын өтеушілер қатысты. Кездесу барысында сотталған азаматтарға жалған діни ағымдарды дәстүрлі діндерден қалай ажыратуға болатындығы жөнінде және деструктивті діни ағымдардың ерекшеліктері туралы дәріс оқып, намаз оқудың тәртібі мен сабырлық туралы да сөз қозғады.
-Қиындықтар кездессе оған сабыр ету — болашақта адамға келетін нығметтердің, жетістіктердің басы деп қабылдауымыз қажет. Халқымыз «Сабыр түбі-сары алтын», «Сабырлы жетер мұратқа, Сабырсыз қалар ұятқа» деп сабырға байланысты нақылдар қалдырған. Сондықтан ашуды ақылға жеңдіріп, өз-өзіңді ұстап сабырға шақыру, ашуланбау нағыз мұсылмандық. Біреуге қиянат жасамай,тіл тигізбей, бойларыңызды жаман әдеттерден аулақ ұстаңыздар,- деді ұстаз М.Түлкібаев.
Кездесу соңында жазасын өтеушілер аталған тақырып бойынша мешіт ұстазына өздерін қызықтырып жүрген сұрақтар қойып, қойған сауалдарына толыққанды жауап алды.
Достанова Дана
Қызылорда облысы бойынша ҚАЖД
