Ақтөбе облысы бойынша ҚАЖ Департаментіне қарасты КА- 168\2 түзеу мекемесі жанындағы кешкі (ауысымдағы) жалпы білім беретін мектепте 1 қыркүйек Білім күніне арналған «Терең білім, еңбекқорлық және Отаншылдық қасиет» тақырыбында салтанатты жиын өтті.
Аталған іс-шараға мектеп ұстаздары мен кешкі мектепте білім алушы сотталғандар, мекеме қызметкерлері және жасақ бастықтары қатысты. Іс- шараны құттықтау сөзімен ашқан мектеп директоры Шамшат Жубай ашып, білім алушыларға көздеген мақсат-мұраттарына қол жеткізіп, жанұяларына аман оралуларына тілек білдіріп, жаңа оқу жылына шығармашылық табыстар мен сәттілік тер тіледі.
Келесі сөз алған КА- 168/2 түзеу мекемесінің әлеуметтік-психологиялық және тәрбие жұмыс жөніндегі бастығының міндетін атқарушы әділет подполковнигі Сәндібек Дюзембаев, білім алушыларды 2022-2023 жаңа оқу жылымен құттықтап, кешкі мектеп қабырғасында алған білімдері жазасын өтеп шыққаннан кейін одан әрі білімдерін толықтырып, мамандық алуларына мүмкіндіктер сыйлайтынын атап өтті.
Қазақстан Республикасы Қылмыстық атқару кодексінің 127 – бабында көрсетілгендей, негізгі және орта білімі жоқ 30 жасқа толмаған сотталғандар түзеу мекемелерінде міндетті түрде білім алуы тиіс. Ақтөбе облысы бойынша ҚАЖ Департаментіне қарасты КА- 168\2 түзеу мекемесі жанындағы жалпы білім беретін кешкі мектепке 2022-2023 оқу жылында ниет білдірген 60 оқушы- сотталған 9-11 кластар бойынша білім алуға қабылданды.
Білім күніне арналған салтанатты іс- шара барысында кешкі мектепте білім алушы жазасын өтеушілер өз өнерлерін ортаға салды.
Гүлфайруз Төремұратова,
Ақтөбе облысы бойынша ҚАЖ Департаментінің баспасөз хатшысы