Атырау облыстық сотында қылмыстық істер жөніндегі сот алқасының төрағасы Т.Уалиеваның төрағалығымен «Қамауға алу түріндегі бұлтартпау шараларын санкциялау және ҚПК-нің 106-бабының тәртібінде шағымдарды қарау барысындағы тергеу соттарының құқық қолданудағы өзекті мәселелері» тақырыбында семинар өтті.
Іс-шараға облыстық соттың қылмыстық істер жөніндегі сот алқасының судьялары, Атырау қаласының мамандандырылған тергеу сотының төрағасы мен судьялары, облыстың, аудандық және оларға теңестірілген соттардың төрағалары мен судьялары қатысты.
Кездесу барысында сотқа дейінгі сатыға бақылауды күшейту туралы мәселе қозғалды. Т.Уалиева қамауда ұстауға санкция беру және оны ұстау мерзімін ұзарту мәселесіне мұқият қарау қажеттігіне назар аударды. Күдіктің негізділігін тексеру, қамауда ұстауға санкция беру үшін негіздің бар-жоғын мұқият зерделеу қажет екенін атап өтті.
Қылмыстық істер жөніндегі сот алқасының судьясы Д.Тухфатова ҚПК-нің 106-бабы тәртібінде шағымдарды қарау бойынша құқық қолдану практикасы мәселесін қозғады. Сонымен қатар, тергеу судьяларының тәжірибеде кездесетін өзекті мәселелер жайындағы сұрақтары талқыланды.
Атырау облыстық сотының баспасөз қызметі
