Алматыда КСРО халық әртісі, атақты опера әншісі Роза Бағлановаға ескерткіш орнатылады, — деп хабарлайды Tengrinews.kz тілшісі.
Ескерткіш Қабанбай батыр көшесінің оңтүстігінде, Байсейітова көшесінің шығысына қарай қойылады.
«Бюджет 2021 жылдың екінші жартысында қаралады. Бүгінгі таңда ескерткіштің нақты сомасы белгісіз», — деді мәдениет басқармасындағылар.
Айта кетейік, халық әртісінің ескерткіші өзі дүниеге келген Қызылорда облысының Әйтеке би ауылында 2015 жылы орнатылған.
Роза Бағланова Қызылорда педагогикалық институтында білім алған. 1941 жылы оған Мәскеу консерваториясына жолдама берілді, бірақ соғыс басталып, ол Өзбек КСР-нің мемлекеттік әйелдер ән-би ансамблімен бірге майданға аттанды. Ұлы Отан соғысы жылдарында әншінің шығармашылық жолы басталды.
Әртістер бригадасының құрамында жүрген ол Кеңес әскері жауынгерлерінің алдында майданда өнер көрсетті. Әнші Лидия Русланованың репертуарынан әндер мен частушкалар, соның ішінде әйгілі «Ах, Самара-городокты» шырқайтын.
