Алматыда ақпан жылы күндерімен басталды. 2 ақпанға қараған түні қалада жаңбыр жауды. Алматыда көктемгі жылу қанша уақытқа созылатынын «Қазгидромет» синоптиктері айтып берді, — деп хабарлайды Tengrinews.kz тілшісі.
«2 ақпанда Қазақстанның оңтүстік-шығыс бөлігіне Иран аумағынан оңтүстік циклондар шығып, жылу келді. Түнде жауын-шашын жаңбыр түрінде болды, бірақ тауларда төмен температура сақталатындықтан қар түсті», — деді «Қазгидромет» РМК Алматы бөлімшесінің инженер-синоптигі Гүлтансын Медеуова.
2 ақпанда ауа температурасы +10 градусқа дейін барды. Жылдың осы мезгілінде Алматыдағы ең жылы күн саналатын рекорд көрсеткіш +13 градус, ол 2007 жылы болған.
«Ақпанның екінші онкүндігінде, 15-сі мен 20-сы аралығында температураның төмендеуін күтеміз. Түнде тұман түсіп, көктайғақ болады», — деді Гүлтансын Медеуова.
Еске салайық, бұдан бұрын «Қазгидромет» өкілдері ақпанда Қазақстанда ауа райы қандай болатынын хабарлаған.
