Қазақстандағы барлық мектепте Face ID технологиясы арқылы кіруді бақылау жүйесін енгізу жоспарланып отыр. Үкіметте өткен білім беру саласын цифрландыру жөніндегі кеңесте премьер-министрдің бірінші орынбасары Нұрлыбек Нәлібаев осындай тапсырма берген. Бұл туралы Baribar.kz хабарлап отыр.
Үкімет мәліметінше, биометриялық жүйе екі міндетті шешуге тиіс. Біріншіден, білім беру ұйымдарындағы қауіпсіздікті күшейтеді. Екіншіден, оқушылардың сабаққа қатысуын автоматты түрде тіркейді.
Сонымен қатар оқу-ағарту министрлігі «Қазақтелекоммен» бірлесіп, өңірлерді ұлттық білім беру платформасына кезең-кезеңімен қосуды бастайды. Платформа білім беру саласындағы мемлекеттік қызметтерді автоматтандыруға арналған.
Балабақшадағы әр балаға бөлінетін қаржы есептеу тәртібі өзгереді
Үкімет мектепке дейінгі білім беруді қаржыландыру тәртібін де қайта қарайды. Осы мақсатта мемлекеттік білім беру тапсырысының құнын есептеудің бірыңғай әдістемесі енгізіледі.
Жаңа тәртіп бойынша әр балаға бөлінетін қаржының негізгі мөлшері ел бойынша ортақ болады. Ал өңірлердің ерекшеліктерін ескеру үшін оған түзету коэффициенттері қолданылады. Олар жергілікті шығындарды, жалақы деңгейін және әр аймақтың өзге де ерекшеліктерін есепке алуға тиіс.
Еске салайық, 2026-2027 оқу жылынан бастап Қазақстан мектептерінде «Жеке қауіпсіздік» курсы өткізіліп жатыр.
