Қазақ тілі – халқымыздың рухани қазынасы, ұлттық болмысымыздың айнасы және Қазақстан Республикасының мемлекеттік тілі. Мемлекеттік тілді құрметтеу – әрбір азаматтың елге деген құрметінің көрінісі. Ал сот жүйесінде мемлекеттік тілдің қолданылуының маңызы одан да ерекше деп есептеймін.
Күнделікті жұмыс барысында мемлекеттік тілдің қоғам өміріндегі маңызды рөліне көз жеткізіп келемін. Сотқа жүгінген әрбір азамат өзінің құқықтары мен заңды мүдделерінің түсінікті әрі қолжетімді түрде қорғалғанын қалайды. Сондықтан сот ісін жүргізуде мемлекеттік тілдің кеңінен қолданылуы – заң талаптарын орындаумен қатар, азаматтардың сот төрелігіне деген сенімін арттыратын маңызды фактор.
Мемлекеттік тілде сауатты сөйлеу және іс жүргізу – сот қызметкеріне қойылатын кәсіби талаптардың бірі. Құжаттарды дұрыс әрі түсінікті рәсімдеу, азаматтардың өтініштері мен сұрақтарына мемлекеттік тілде жауап беру, сот процесіне қатысушыларға құқықтары мен міндеттерін анық түсіндіру – біздің күнделікті қызметіміздің ажырамас бөлігі.
Менің ойымша, мемлекеттік тілдің мәртебесін көтеру тек заңмен немесе белгілі бір мекемелердің жұмысымен шектелмеуі керек. Тілге деген құрмет ең алдымен әр адамның жеке ұстанымынан басталады. Әр қызметкер өз жұмысында қазақ тілін неғұрлым көп әрі сапалы қолданса, оның қоғамдағы қолданыс аясы да соғұрлым кеңейе түседі.
Сот жүйесі – заң үстемдігі мен әділдіктің маңызды институты. Сондықтан сот саласында мемлекеттік тілдің қолданылуын дамыту – құқықтық мәдениетті қалыптастырудың да бір бағыты. Мемлекеттік тілде сапалы құқықтық құжат әзірлеу, кәсіби терминдерді дұрыс пайдалану және тіл мәдениетін сақтау сот қызметінің сапасына тікелей ықпал етеді.
Мемлекеттік тілді білу – тек қызметтік міндет емес, ел азаматтарына деген құрмет деп қабылдаймын. Ана тілімізді ардақтап, оның қолданыс аясын кеңейтуге әрқайсымыз өз еңбегімізбен үлес қоса аламыз.
Мен үшін мемлекеттік тілде қызмет атқару – туған елге деген құрметтің, кәсіби жауапкершіліктің және азаматтық ұстанымның көрінісі. Тіл – халықты біріктіретін күш. Ал мемлекеттік тілдің сот жүйесінде кеңінен қолданылуы – заң мен әділдіктің баршаға түсінікті әрі қолжетімді болуына жасалған маңызды қадам.
Сондықтан мемлекеттік тілді дамытуға үлес қосу – баршамызға ортақ міндет. Қазақ тілінің мәртебесін көтеру әрқайсымыздың күнделікті ісімізден басталады.
Ұлытау аудандық сот
Әкімшісі басшысының орынбасары: Ақмаржан Калекенова
