Волонтерлік қозғалысын дамытуға бағытталған мемлекеттік саясатты іске асыру аясында Абай облысы бойынша ҚАЖ-дың қауіпсіздігі барынша жоғары мекемесінің қызметкерлері Семей қаласында қоғамдық көлік жүргізушілерін қолдау мақсатында әлеуметтік акция ұйымдастырды.
Ауа температурасы +40 °C-қа дейін көтерілген аптап ыстық кезеңінде мекеме қызметкерлері қаладағы ең қарбалас автобус бағыттарына барып, күн сайын жолаушыларды қауіпсіз тасымалдауды қамтамасыз етіп жүрген жүргізушілерге қолдау көрсетті. Акция барысында бағыттық автобустардың жүргізушілеріне салқындатылған сусындар табыс етілді.
Іс-шара аясында 40-тан астам қоғамдық көлік жүргізушісіне қолдау көрсетілді.
Жүргізуші мамандығы жоғары жауапкершілікті, сабырлылықты және тұрақты зейінді талап етеді. Олардың көпшілігі жұмыс күнін таңғы сағат бесте бастап, кешкі уақытқа дейін рөлде отырып, қалалық қоғамдық көліктің үздіксіз жұмысын, тіпті аптап ыстық жағдайында да қамтамасыз етіп келеді.
– Осындай ыстық күндері көрсетілген кез келген қамқорлықтың маңызы зор. Біз күні бойы рөлде боламыз, кейде ең қажетті дүниелерге де уақыт табыла бермейді. Мекеме қызметкерлеріне қолдауы мен адамгершілік танытқаны үшін шынайы алғысымызды білдіреміз. Осындай игі бастамалар күш-жігер береді әрі еңбегіміздің бағаланатынын сезіндіреді, – деді автобус жүргізушісі.
Өз кезегінде мекеме қызметкері Рамиль Қайрамбаев қоғамдық көлік жүргізушілерінің қала тұрғындарының қауіпсіздігі үшін күн сайын үлкен жауапкершілік арқалайтынын, ал аптап ыстық жағдайында олардың еңбегі бұрынғыдан да күрделене түсетінін атап өтті.
– Біз жүргізушілерге алғысымызды білдіріп, қарапайым болса да маңызды қолдау көрсетуді мақсат еттік. Осындай ізгі бастамалар қоғамдағы өзара құрметті, сенімді және өзара көмек мәдениетін нығайтады деп сенемін. Қызметкерлердің еріктілік және қайырымдылық шараларына қатысуы әлеуметтік құндылықтарды нығайтуға, азаматтық жауапкершілікті арттыруға және өзара көмек мәдениетін қалыптастыруға ықпал етеді. Мұндай игі шаралар алдағы уақытта да жалғасын табады, – деді Рамиль Қайрамбаев.
