Қарағанды қаласында Қазақстан Республикасының Президенті Қасым-Жомарт Тоқаевтың бастамасымен жүзеге асырылып жатқан «Таза Қазақстан» жалпыұлттық тұжырымдамасы аясында кең көлемді экологиялық-ағартушылық іс-шара ұйымдастырылды.
Аталған жоба қоғамда экологиялық мәдениетті қалыптастыруға, қоршаған ортаға деген жауапкершілікті арттыруға және жас ұрпақтың табиғатқа жанашыр көзқарасын нығайтуға бағытталды. Бастама аясында Қарағанды қаласындағы 96 мектеп қамтылып, білім беру ұйымдарындағы мұғалімдер мен оқушылардың 10%-ы арнайы оқыту бағдарламасынан өтті.
Іс-шара барысында экологиялық қауіпсіздік, тұрмыстық қалдықтарды сұрыптау, қайта өңдеудің маңызы, қоршаған ортаны қорғау мәдениеті және күнделікті өмірде экологиялық дағдыларды дамыту тақырыптары жан-жақты түсіндірілді. Сонымен қатар қатысушыларға қалдықтарды бөлек жинаудың халықаралық тәжірибелері мен оның қоршаған ортаға тигізетін оң әсері туралы кең ақпарат берілді.
Жоба нәтижесінде 4000-нан астам мұғалім мен 7900-ден астам оқушы қамтылды. Бұл көрсеткіш экологиялық ағарту жұмыстарының ауқымын айқындап қана қоймай, қоғамның қоршаған ортаны қорғау мәселесіне деген қызығушылығының артып келе жатқанын көрсетеді.
Оқыту жұмыстарын эколог-маман Айгүл Абдуалиева жүргізді. Ол қатысушыларға экологиялық мәдениетті қалыптастырудың маңыздылығын түсіндіріп, табиғатты қорғау – әр азаматтың ортақ міндеті екенін атап өтті. Сабақтар барысында теориялық түсіндірулермен қатар практикалық мысалдар да көрсетіліп, қатысушылардың экологиялық сауаттылығын арттыруға басымдық берілді.
Іс-шара аясында мектептерге арнайы жинақ контейнерлері орнатылды. Жалпы саны 1728 контейнер Қарағанды қаласындағы 96 мектепке орналастырылды. Бұл контейнерлер қағаз, пластик және тұрмыстық қалдықтарды бөлек жинауға арналған. Мұндай инфрақұрылым оқушылардың күнделікті өмірде қалдықтарды сұрыптау дағдысын қалыптастыруға мүмкіндік береді.
Мамандардың пікірінше, экологиялық білім беру жұмыстары мектеп қабырғасынан басталуы қажет. Себебі жас буынның табиғатқа деген көзқарасы мен жауапкершілігі дәл осы кезеңде қалыптасады. Экологиялық тәрбие – тек бір реттік акция емес, қоғамның тұрақты дамуына негіз болатын маңызды бағыттардың бірі.
Бүгінде әлем елдері климаттың өзгеруі, қоршаған ортаның ластануы және табиғи ресурстардың азаюы мәселелерімен бетпе-бет келіп отыр. Осындай жағдайда «Таза Қазақстан» секілді бастамалардың маңызы арта түсуде. Бұл жоба тұрғындардың экологиялық мәдениетін көтеруге, табиғатты қорғау құндылықтарын насихаттауға және қоғамда экологиялық жауапкершілік қағидаттарын орнықтыруға бағытталған.
Қарағанды қаласында өткен бұл ауқымды іс-шара – экологиялық сана мен мәдениетті қалыптастыру жолындағы маңызды қадамдардың бірі. Мұндай бастамалар алдағы уақытта да жалғасып, білім беру ұйымдарында экологиялық тәрбие жұмыстары жүйелі түрде жүргізіледі деп күтілуде.
Табиғатты қорғау – болашақ ұрпақ алдындағы ортақ жауапкершілік. Сондықтан қоршаған ортаға жанашырлықпен қарау, экологиялық мәдениетті қалыптастыру және табиғи ресурстарды тиімді пайдалану – бүгінгі күннің басты міндеттерінің бірі болып қала береді.
Айсауле Асылханқызы
