Жыл сайын 1 мамырда елімізде ерекше мәнге ие мереке – Қазақстан халқының бірлігі күні аталып өтеді. Бұл күн – сан түрлі этнос пен ұлыс өкілдері тату-тәтті өмір сүріп жатқан Қазақстан қоғамының басты құндылықтарын айқындайтын мереке. Бірлік пен келісім – тәуелсіз еліміздің дамуы мен тұрақтылығының берік негізі.
Қазақстан – көпұлтты мемлекет. Бүгінде елімізде 130-дан астам этнос өкілдері бір шаңырақ астында өмір сүруде. Олардың әрқайсысы өз мәдениетін, тілін, салт-дәстүрін сақтай отырып, ортақ Отанымыздың дамуына үлес қосып келеді. Бұл – елдегі ұлтаралық татулық саясатының жемісі. Осы бағытта маңызды рөл атқаратын құрылымдардың бірі – Қазақстан халқы Ассамблеясы. Ол қоғамдағы тұрақтылық пен келісімді нығайтуға бағытталған бірегей институт ретінде танылған.
Бірлік күні – тек мерекелік шаралармен шектелетін күн емес. Бұл – әрбір азаматтың жүрегіндегі өзара құрмет пен түсіністікті дәріптейтін ерекше дата. Бұл күні еліміздің барлық өңірінде концерттер, көрмелер, этномәдени фестивальдер ұйымдастырылып, халықтар достығы кеңінен насихатталады. Әр этнос өз өнерін, ұлттық тағамдарын, дәстүрін таныстырып, мәдени әртүрліліктің байлығын көрсетеді.
Қазақстанның бүгінгі жетістіктері – ел ішіндегі татулық пен тұрақтылықтың нәтижесі. Әлемдік қауымдастық Қазақстанды ұлтаралық келісімнің үлгісі ретінде мойындап отыр. Бұл жетістік – дана саясат пен халықтың бір-біріне деген сыйластығының арқасы.
Қорыта айтқанда, Қазақстан халқының бірлігі күні – тек өткенді еске алатын емес, болашаққа бағдар беретін мереке. Бірлік бар жерде – тірлік бар. Сондықтан әрбір қазақстандық ел бірлігін көздің қарашығындай сақтап, ортақ құндылықтарды қадірлеуі тиіс.
Серікбаев Нұрболат Ибрагимұлы, Алматы облысы Қонаев қаласының Мамандандырылған тергеу сотының бас маманы
