Қазіргі қоғамда жоғары білім тек кәсіби дағды қалыптастыру құралы ғана емес, тұлғаның жан жақты дамуына негіз болатын маңызды кезең ретінде қарастырылады. Осы тұрғыдан алғанда, әл-Фараби атындағы Қазақ ұлттық университеті еліміздегі жетекші оқу орындарының бірі ретінде сапалы білім мен терең тәрбие берудің үлгісін қалыптастырып келеді. Университет қабырғасында білім алған түлектер бүгінде мемлекет дамуына үлес қосып жүрген білікті мамандар ретінде танылып отыр.Оқу ордамыздың түлектерінің басты ерекшелігі олардың жан жақты даярлығы мен кәсіби икемділігі. Университетте алған білім тек теориялық деңгейде шектелмей, тәжірибемен ұштасып, нақты өмірде қолдануға бағытталады. Осы себепті оқу орнын тәмамдаған жастар түрлі салада өз орнын тауып, жоғары нәтижелерге қол жеткізуде.Бүгінде университет түлектері мемлекеттік қызметте, құқық қорғау органдарында, білім беру және ғылым саласында, бизнес пен халықаралық ұйымдарда табысты еңбек етуде. Олар елдің әлеуметтік экономикалық дамуына үлес қосып, қоғамдық тұрақтылық пен заңдылықтың нығаюына қызмет етіп келеді. Әсіресе, құқық саласында білім алған түлектер заң үстемдігін қамтамасыз ету бағытында белсенді жұмыс атқаруда.
Оқу орнында қалыптасқан білім беру жүйесі түлектердің кәсіби ғана емес, тұлғалық қасиеттерін де дамытуға бағытталған. Университет қабырғасында жастар жауапкершілік, адалдық, әділдік секілді құндылықтарды бойына сіңіреді. Бұл қасиеттер олардың болашақ қызметінде маңызды рөл атқарады.
ҚазҰУ түлектерінің жетістіктері халықаралық деңгейде де көрініс табуда. Көптеген жас мамандар шетелдік ұйымдарда қызмет атқарып, жаһандық жобаларға қатысуда.Сонымен қатар, университет түлектері ғылым мен инновация саласында да белсенділік танытуда. Жас ғалымдар түрлі ғылыми зерттеулер жүргізіп, жаңа идеялар мен жобаларды жүзеге асыруда. Университет түлектерінің табысты болуы оқу орнында қалыптасқан білім беру ортасының сапасымен тығыз байланысты. Білім ошағының қабырғасында студенттерге заманауи білім беру технологиялары ұсынылып, олардың шығармашылық және сыни ойлау қабілеттерін дамытуға жағдай жасалады. Осындай ортада тәрбиеленген жастар кез келген өзгеріске бейімделіп, жаңа талаптарға тез икемделе алады.Түлектердің кәсіби қалыптасуына тәжірибелік білімнің де әсері зор. Университетте студенттер түрлі тәжірибеден өтіп, нақты жұмыс жағдайымен танысады. Бұл олардың еңбек нарығына бейімделуін жеңілдетіп, жұмысқа орналасу мүмкіндігін арттырады.Сонымен бірге, университет пен түлектер арасындағы байланыс үздіксіз сақталады. Оқу орнын тәмамдаған мамандар университет өміріне белсенді араласып, жас буынға өз тәжірибелерімен бөліседі. Мұндай сабақтастық білім беру сапасын одан әрі арттыруға ықпал етеді.
әл-Фараби атындағы Қазақ ұлттық университетінің түлектері еліміздің дамуына елеулі үлес қосып жүрген білікті әрі жауапты мамандар ретінде қалыптасып отыр. ҚазҰУ берген сапалы білім мен тәрбиенің нәтижесінде олар қоғамның әр саласында табысты еңбек етіп, ел болашағын нығайту жолында маңызды рөл атқаруда. Университет түлектері-мемлекеттің интеллектуалдық әлеуетін арттыратын негізгі күштердің бірі.
Г.Д.Ансатбаева
әл-Фараби атындағы ҚазҰУ-дың
заң факультеті азаматтық құқық,
азаматтық іс жүргізу және еңбек құқығы
кафедрасының аға оқытушысы
