Қазақстанда төтенше жағдайлар саласында қауіпсіздікті арттыруға бағытталған маңызды технологиялық жаңалық ұсынылды. Төтенше жағдайлар министрлігі әзірлеген инновациялық робот-өрт сөндіруші республикалық онлайн-марафон барысында көпшілікке таныстырылды. Бұл жоба – отандық мамандардың бірлескен еңбегінің нәтижесі әрі еліміздің технологиялық дамуының нақты көрінісі.
Аталған робот Петропавл қаласындағы зауыт мамандары мен Солтүстік Қазақстан облыстық Төтенше жағдайлар департаментінің тығыз ынтымақтас тығы арқылы жасалған. Құрылғы заманауи талаптарға сай жабдықталған: ол қашықтан басқару жүйесімен жұмыс істейді жəне шынжыр табанды жүріспен қозғалады. Мұндай техникалық шешімдер роботтың қиын əрі қауіпті аймақтарда кедергісіз қозғалуына мүмкіндік береді. Роботтың басты мақсаты – өртті адам өміріне қауіп төндіретін күрделі жағдайларда сөндіру. Осындай жағдайларда құтқарушылардың өміріне тікелей қатер төнеді, ал робот сол қауіптің алдын алуға көмектеседі. Телемарафон аясында Солтүстік Қазақстан облысы ТЖД Өрт сөндіру жəне авариялық-құтқару жұмыстарын ұйымдастыру басқармасы жедел кезекшісінің орынбасары, азаматтық қорғау капитаны Жанат Қапаров жаңа роботтандырылған қондырғының ерекшеліктеріне тоқталды. Оның айтуынша, бұл құрылғы ең алдымен құтқарушылардың өмірін қорғауға бағытталған. Яғни, адамдардың орнына қауіпті аймаққа робот жіберіліп, негізгі тəуекел техникаға жүктеледі. Сонымен қатар, мұндай технологияларды енгізу құтқару операцияларының тиімділігін арттыруға ықпал етеді. Робот өртті сөндіру процесін жеделдетіп қана қоймай, уақыт пен ресурстарды үнемдеуге мүмкіндік береді. Ең маңыздысы – адам шығыны қаупін едəуір төмендетеді. Бұл қазіргі заманғы төтенше жағдайлар қызметі үшін аса маңызды көрсеткіштердің бірі. Жаңа робот-өрт сөндіруші – Қазақстанның инновациялық əлеуетінің айқын дəлелі. Ол тек техникалық жаңалық емес, сонымен қатар адам өмірін қорғауға бағытталған стратегиялық шешім.
Аружан МАУЛЕНБАЙ, «Заң газеті»
