Қазақстан Республикасында мемлекеттік тілдің мәртебесі елдің негізгі заңымен бекітілген. Қазақстан Республикасының Конституциясы 7-бабына сәйкес, қазақ тілі – мемлекеттік тіл және ол мемлекеттік басқару мен ресми қатынастардың негізгі тілі болып табылады.
Мемлекеттік қызметші – мемлекет атынан әрекет ететін тұлға. Сондықтан мемлекеттік тілде еркін сөйлеп, ресми құжаттарды сауатты жүргізу – тек кәсіби талап қана емес, заңмен бекітілген міндет. Бұл талаптар Қазақстан Республикасындағы тілдер туралы заң нормаларында да нақты көрсетілген.
Бүгінде мемлекеттік органдарда іс қағаздарын қазақ тілінде жүргізу деңгейі жыл сайын артып келеді. Дегенмен, құжаттардың сапасы, терминдердің дұрыс қолданылуы және ресми стильдің сақталуы әлі де өзекті мәселелер қатарында қалып отыр. Бұл, өз кезегінде, мемлекеттік қызметшілердің тілдік сауаттылығын тұрақты түрде жетілдіру қажеттігін көрсетеді.
Мемлекеттік тілдің мәртебесін арттыру – тек нормативтік талаптарды орындаумен шектелмейді. Бұл – азаматтармен тиімді байланыс орнатудың, мемлекеттік қызметтің ашықтығы мен қолжетімділігін қамтамасыз етудің маңызды құралы. Халықпен тікелей жұмыс істейтін мемлекеттік қызметшілер үшін қазақ тілін жетік меңгеру – қоғам сенімін арттыратын негізгі факторлардың бірі.
Қазіргі кезеңде мемлекеттік органдарда:
- құжат айналымын толық мемлекеттік тілге көшіру,
- қызметкерлердің тілдік біліктілігін жүйелі түрде арттыру,
- ресми хат алмасу мәдениетін қалыптастыру
сияқты бағыттар бойынша жұмыстар күшейтіліп келеді.
Қорытындылай келе, мемлекеттік тіл – мемлекеттік қызметшінің кәсіби құзыреттілігінің ажырамас бөлігі. Қазақ тілін күнделікті қызмет барысында белсенді қолдану арқылы ғана оның мемлекеттік тіл ретіндегі мәртебесі нақты іс жүзінде нығая түседі.
Ақтөбе қаласының әкімшілік құқық бұзушылықтар жөніндегі мамандандырылған ауданаралық сотының сот әкімшісінің басшысы А.Каримолдаева
