Қазақстан спортшылары қысқы Олимпиада ойындарындағы нәтижесі үшін 255 мың доллар сыйақы алады, — деп хабарлайды Massaget.kz тілшісі.
Қазақстан заңнамасына сәйкес Олимпиадада 1-6-орын алған спортшылар мен олардың жаттықтырушыларына ақшалай сыйақы қарастырылған. Биыл ел намысын қорғаған 36 спортшының ішінен жүлделі орынға тек екеуі ілікті.
Надежда Морозова 3000 метр қашықта 6-орынға тұрақтады. Енді өзі де, жаттықтырушысы да 5 мың доллардан (шамамен 2,5 миллион теңге — еск.) алады.
Мәнерлеп сырғанаушы Михаил Шайдоров алтын медаль жеңіп алды, ол 250 мың долларға бағаланады (шамамен 124,5 миллион теңге — еск.). Михаил Шайдоровтың жеңісі — тарихи жетістік.
Заң бойынша мемлекет сыйақыны бір жылға дейін кешіктіруге құқылы. Бұл уақыт аралығында спортшылар допингке қатысты барлық тексерістен өтіп, қаражат резерв қорынан бөлінеді. Қазір нақты төлем мерзімі белгісіз.
