Президент Қасым-Жомарт Тоқаев Түркістан облысы Жетісай ауданындағы жеке үйде болған өрт салдарынан көптеген адам қаза табуына байланысты көңіл айтты, — деп хабарлайды Massaget.kz тілшісі.
Бүгін таңертең Түркістан облысы ТЖД-ға Жетісай ауданы Алғабас ауылында орналасқан екі қабатты жеке тұрғын үй өртенгені туралы хабарлама түскен.
Оқиға орнына өрт сөндіру бөлімі жеткен кезде үй толықтай өртке оранғаны анықталған.
«Өртті барлау және сөндіру барысында үйдің ішінен ес-түссіз күйдегі үш адам эвакуацияланып, жедел жәрдем бригадасына тапсырылды. Үйдің ішінен тоғыз баланы қоса алғанда, барлығы 12 адамның денесі табылды», — деп жазылған хабарламада.
Көршілердің айтуынша, алдыңғы күні үй иелері іс-шара өткізген, үйде қонақтар болған. Өрт 360 шаршы метр аумақта толықтай сөндірілген.
«Оқиға орнында барлық жедел қызмет жұмыс істеп жатыр. Тергеу басталды, өрттің шығу себептері анықталып жатыр», — деді әкімдік өкілдері.
Президенттің тапсырмасы
Президент Үкімет пен Түркістан облысының әкіміне зардап шеккен азаматтардың туған-туыстарына барлық қажет көмекті көрсетіп, қайғылы оқиғаны жан-жақты тексеруді тапсырды.
