Қазақ халқының тарихында тағдыры да, тағылымы да бөлек тұлғалар аз емес. Солардың ішінде ұлттың рухани темірқазығына айналған, өз заманының ойшылы әрі күрескері болған Ахмет Байтұрсынұлының орны ерекше. Ол – ХХ ғасыр басындағы Алаш қозғалысының алдыңғы қатарлы қайраткері, ағартушы, реформатор, ақын, публицист, ғалым-лингвист, ең бастысы – қазақ тіл білімінің негізін қалаушы. Халық оны тегіннен-тегін «Ұлт ұстазы» деп атаған жоқ.
Ахмет Байтұрсынұлы – ұлт руханиятының жаңа дәуірін қалыптастырған тұлға. Оның шығармашылық мұрасы – тек әдебиет пен ғылым саласының емес, ұлттық сананың жаңғыруының айнасы. Ол өз еңбектерінде қазақ халқының тарихын, мәдениетін, ділін терең түсініп, рухани азаттығына қызмет етті.
Ахмет Байтұрсынұлының «Маса» жинағы мен көсемсөздері сол дәуірдің саяси, әлеуметтік мәселелерін қозғап, елді оянуға, білімге, ұлт болып ұйысуға шақырды. Ол сөздің құдіретін қару етіп, халқын надандық шырмауынан шығаруды мақсат етті.
Ахмет Байтұрсынұлы – қазақ тілін ғылым тіліне айналдырудың көшбасшысы. Ол әліпби реформасын жасап, төте жазуды ұсынды. Бұл қазақ баласының сауатын ашуға, білімге жол салуға зор ықпал етті. Сонымен қатар, ғалымның «Тіл-құрал» оқулығы қазақ тілінің тұңғыш ғылыми жүйесін қалыптастырды.
Тіл – ұлттың жаны, ал сол тілді сақтап, оны ғылым тіліне көтеру – нағыз ерлік. Ахмет Байтұрсынұлы осы миссияны орындап шықты.
Ахмет Байтұрсынұлының өмір жолы – толықтай ұрпаққа қызмет ету тарихы. Ол мұғалімдік қызмет атқарып, ел ішіндегі қарапайым халықтың балаларын оқытты, оқу-ағарту ісін дамытуға күш салды. Оқу бағдарламалары мен оқулықтар жазып, қазақ баласының сауат ашуына жаңа мүмкіндіктер ашты.
Ахмет Байтұрсынұлы – Алашорда үкіметінің идеологтарының бірі. Ол ұлт тәуелсіздігі мен дербестігін аңсады. Қиын-қыстау заманда да рухани күресті тоқтатпай, халқына сенім мен жігер сыйлады. Оның әрбір еңбегі – азат ойдың, ұлтшылдықтың үлгісі.
Ахмет Байтұрсынұлы – тіліне, діліне, тарихына адал ұрпақтың рухани ұстазы. Ол ұлттың санасын оятты, қазақ тілін ғылым биігіне көтерді, руханияттың мызғымас қорғанына айналды. Бүгінгі тәуелсіз Қазақстан үшін оның еңбегі – сарқылмас қазына, мәңгілік өнеге.
Ұлт ұстазының «Тілі жоғалған жұрттың өзі де жоғалады» деген ұлағатты сөзі әр қазақтың санасында жаңғырып тұруы тиіс. Себебі тілін қадірлеген халық қана мәңгілік елге айналады.
Жалағаш аудандық соты Әкімшісінің
басшысы А.Қ.Алтынбаев
