Алматыдағы балалар колониясынан рақымшылық бойынша алғашқы жасөспірім бостандыққа шықты

Жуырда 16 жасар Жансұлтан “Қазақстан Республикасы Конституциясының 30 жылдығына байланысты рақымшылық жасау туралы» заңды қолдану аясында бостандыққа шықты.
Жасөспірім Жансұлтанның ата-анасы ажырасып, ол інілерімен бірге көзі көрмейтін әжесінің қолында қалады. Бала көңіл өзінің құрдастары сияқты жақсы киініп, жақсы тамақ ішуді аңсайтын. Алайда әжесінің зейнетақысы оның бұл арманын орындауға жетпейтін еді. Ақыры оң-солын толық танып үлгермеген 14 жасар ол ұрлық жасап, Алматыдағы кәмелетке толмағандарды ұстауға арналған қауіпсіздігі орташа мекемесінен бірақ шыққан еді. Жансұлтан балалар колониясында жүріп мекеме ішіндегі орта мектепте оқыды, сондай-ақ мекеме ішіндегі түрлі тәрбиелік іс -шараларға белсенді қатысқаны және жақсы мінез-құлқы үшін марапаттарға ие болды.
1 жыл 3 айдан кейін рақымшылыққа іліккен жасөспірімді мекеме қызметкерлері заңда қарастырылғандай жолақысын төлеп Маңғыстау облысындағы тұрғылықты жеріне өздері алып кетті.
Бостандыққа шыққан Жансұлтан темір торда жүріп еркіндіктің қадірін түсінгенін және болашақта дұрыс өмір сүретінін айтып, өзіне тәлімді тәрбие берген, жарқын өмірге жол сілтеген мекеме қызметкерлері мен ұстаздарына алғысын тебірене жеткізді.