Атырау облысы бойынша Қылмыстық-атқару жүйесі департаментінің 79 мекемесінде «Бір ел – бір кітап» республикалық акциясы аясында қазақ әдебиетінің көрнекті өкілдері Тәкен Әлімқұлов пен Жұмекен Нәжімеденовтың шығармашылығына арналған кеш ұйымдастырылды.
Шараның басты мақсаты – сотталған азаматтарды кітап оқуға ынталандыру, ұлттық әдеби мұрамен таныстырып, рухани тәрбие беру. Кеш барысында жазушылардың өмір жолы мен әдеби мұрасы таныстырылып, көркем шығармаларынан үзінділер оқылды. Сотталғандар өздері сүйіп оқыған ақын-жазушылардың өлеңдерін жатқа айтып, әдеби көріністер қойды.
Кеш соңында мекеме кітапханасына 50 дана көркем әдебиет сыйға тартылып, белсенділік танытқан сотталғандарға естелік сыйлықтар табысталды.
Осындай мәдени іс-шаралар сотталған азаматтардың рухани әлемін байытып, оң өзгерістерге бастайды.
