Ақша аударған кезде «рақмет», «қайтардым» немесе «қарыз» деп жазуға бола ма, бұл салық органдары тарапынан туындауы мүмкін сұрақтардан сақтануға көмектесе ме? Бұл сауалға Қаржы министрлігінің Мемлекеттік кірістер комитеті жауап берді, — деп хабарлайды Massaget.kz тілшісі.
Tengrinews.kz жолдаған ресми сауалға ведомство былай жауап берген: Салық кодексінің 24-бабына сәйкес екінші деңгейлі банктер мен кейбір банк операцияларын жүзеге асыратын ұйымдар ақпаратты белгіленген нысандар бойынша ұсынады және ақша аударымдарына қатысты түсініктемелерді көрсетпейді.
«Мемлекеттік кірістер органдары ақша аударымдарына қатысты хабарламалар мен ескертулердің мазмұнына қол жеткізе алмайды және көрсетілген түсініктемелер салық тексерісін жүргізіп жатқан кезде заңды мәнге ие емес», — деп жазылған комитеттің ресми жауабында.
Мемлекеттік кірістер комитеті мәліметінше, ақша аударғанда қандай да бір сөз жазу операциялардың салық бойынша бағалануына әсер етпейді.
