Қызметке адалдық пен тәртіпке жауапкершілік – Қожахметов Еркін Шәкірбекұлының басты қағидасы. Ол Қызылорда облысы бойынша ҚАЖ департаментінің 37 мекемесінде кезекші бөлімде қызмет атқарады.
Еңбек жолын 2006 жылы небәрі 19 жасында бақылаушы болып бастаған Еркін Шәкірбекұлы бүгінде кәсіби тәжірибесі мол, өз ісінің шебері. Режим бөлімінің қызметкері, жасақ бастығы қызметтерін атқарып, қазір мекеменің қауіпсіздігін қамтамасыз ететін кезекші бөлімде жұмыс істейді.
Күнделікті міндеттері – сотталғандардың тәртібін бақылау, мекеме аумағын күзету, заңбұзушылықтың алдын алу және қызметкерлерге нұсқау беру.
20 жылға жуық адал еңбегі үшін бірнеше рет ҚАЖ комитетінің, ҚАЖ департаменті бастығының бұйрығымен марапатқа ие болған. Үш ұлдың әкесі ретінде отбасында да, қызметте де жауапкершілікті жоғары қояды.
«Балаларым менің жолымды таңдаса, тек адал әрі әділ болса екен», – дейді ол.
Антына адал Еркін Қожахметов – ҚАЖ саласындағы үлгілі қызметкер.
