Ұлттық экономика экс-министрі Қуандық Бишімбаевтың рақымшылыққа ілігу-ілікпеуі жөніндегі сұраққа Бас прокурордың орынбасары Әсет Чиндалиев жауап берді, — деп хабарлайды Massaget.kz тілшісі.
Чиндалиевтің айтуынша, адам өліміне алып келген қылмыстар рақымшылыққа жатпайды.
«Ілікпейді (Бишімбаев – ред.). Біз жаңа ғана депутаттармен жол апаттары жөнінде талқыладық. Олар: «Жол апаты салдарынан адам қаза тапқан жағдайда, бірақ ол абайсызда болса, рақымшылық қолдануға бола ма?» деп сұрады. Алайда заң жобасын әзірлеушілердің ұстанымы – адам өліміне себеп болған кез келген қылмыс рақымшылыққа жатпайды», – деді Чиндалиев Мәжіліс кулуарында.
Еске салайық, былтыр 13 мамырда Астанада Салтанат Нүкенованы өлтіру ісі бойынша сот үкімі шыққан болатын. Сот Қуандық Бишімбаевты өзінің жұбайын азаптап өлтіргені үшін кінәлі деп танып, 24 жылға бас бостандығынан айырды.
Айта кетейік, Мәжіліс амнистия туралы заңды қабылдады. Оның нәтижесінде мыңдаған сотталған адам бостандыққа шығуы мүмкін.
