Қазақстанда «ерікті» және «өзін-өзі қорғауды қалыптастыру» ұғымдары енгізіліп жатыр. Тиісті заңды 5 мамырда Сенат депутаттары қарады, — деп хабарлайды Massaget.kz тілшісі.
Заңда аумақтық қорғаныстың мақсаттары, міндеттері, қағидаттары анықталған, Президенттің, Үкіметтің, Қорғаныс министрлігінің өкілеті бекітілген. Сондай-ақ, құжатта Президентке тікелей бағынатын және есеп беретін мемлекеттік органдардың, орталық мемлекеттік органдар мен әкімдіктердің құзыреті, сондай-ақ, азаматтардың құқықтары мен міндеттері айқындалған.
Сенаттың жалпы отырысында депутат Марат Қожаев аумақтық қорғаныс туралы заңға әкімді аумақтық қорғаныстың басшысы етіп белгілейтін бап енгізілетінін айтты.
«Заңға сәйкес Қорғаныс министрлігі аумақтық қорғаныс саласындағы уәкілетті орган ретінде аумақтық қорғанысқа дайындық пен оны жүргізу қағидаларын әзірлейді, аумақтық қорғаныс нысандарының тізімін анықтайды, аумақтық әскерді қару-жарақпен қамтамасыз етеді, сондай-ақ, қаралып отырған салада мемлекеттік бақылау жүргізеді. Сонымен қатар, осы заңның 13-бабында әкім тиісті әкімшілік-аумақтық бірліктің аумақтық қорғанысының басшысы саналады, оған қоса оның ұйымдастырылуы мен жай-күйіне жауапты екені белгіленген», – деді Қожаев.
Сенат депутаттары заңды екі оқылымда қарап, оны мақұлдауға дауыс берді.