Мемлекет басшысының Астана халықаралық форумының пленарлық отырысындағы сөзі басталды, — деп хабарлайды Massaget.kz тілшісі.
Президент әлемдік ахуалға қатысты пікір білдірді.
«Дүние жүзін қақтығыстар мен соғыс өрті жайлап барады. Былтырғы мәліметке сәйкес 52 мемлекет қарулы қақтығыс жағдайында тұрған. Ал осындай қатыгез әрекеттерден келген экономикалық шығын 19 триллион долларға жетті. Бұл, шамамен, әлемдік ІЖӨ-нің 13,5 пайызы. Дегенмен осы сандардың арғы жағындағы ахуал одан да қорқынышты: қазіргі қақтығыстар анағұрлым ұзақ әрі күрделі сипатқа ие. Оған көптеген «ойыншы», тіпті ешқандай мемлекетке қатысы жоқ топтар араласады. Бұдан бөлек мұндай қақтығыстардың тамырында түрлі қайшылықтар жатыр. Бұл факторлар бейбітшіліктің берік орнауына кедергі келтіріп отыр», — деді Тоқаев.
Мемлекет басшысы айрықша алаңдаушылық туғызатын тағы бір дүниені атады.
«Ол – әлемдегі осы тектес шиеленістердің жаһанға мүлдем жаңа түсінік пен құндылықтар ұсынып, адамзатты түбегейлі түлеген, бірақ әзірге беймәлім келешекке бастап бара жатқан жасанды интеллектінің даму трендімен еш үйлеспеуі. Бұл орайда тарихи тұжырымдар мен саяси араздыққа негізделген әскери қақтығыстар мен соғыстар мүлдем орынсыз, тіпті ақылға қонбайды. Соғысудың орнына біз халқымызды, әсіресе, жастарымызды саналы әрі өркениетті қоғам құруға үндеуіміз керек. Әрине, қақтығыстардың қай-қайсы да жіті назар аударуды қажет етеді. Әйтсе де ядролық қаруды иеленген мемлекеттер арасындағы шиеленіске айрықша мән бергеніміз жөн», — деді Мемлекет басшысы.
