Еуропа қазақстандықтарға виза беру процесін жеңілдетеді. Сыртқы істер министрлігі егжей-тегжейін айтты, — деп хабарлайды Massaget.kz тілшісі.
Қазақстан мен Еуропа Одағы виза талаптарын өзара оңайлату туралы келісімге қол қоюды жоспарлап отыр. Келіссөздер жүргізу мандатын Еуропа Одағына мүше мемлекеттер мақұлдап, Еуропалық комиссияға ұсынған.
«Бұл келісім бойынша келіссөз өтінішті қарау мерзімін қысқарту, талап етілетін құжаттар тізімін азайту, виза төлемін азайту, қолданылу мерзімі ұзағырақ бірнеше виза алу мүмкіндігін кеңейту, сондай-ақ, өтініш берушілердің жеңілдік санаттарын енгізу сияқты шараларды қамтиды», — деп жауап берді СІМ Tengrinews.kz-ке.
Сыртқы істер министрлігі келісімге қашан қол қойылатынын хабарлаған жоқ. Нақты күні Еуропа тарапымен келіссөз аяқталғаннан кейін анықталады. Өзгерістер тараптар ішкі рәсімдерді орындағаннан кейін күшіне енеді.
Еске салайық, бұған дейін Еуропа қазақстандықтарға виза беру тәртібін жеңілдетуі мүмкін екені хабарланды.
Еуропа Одағының Сыртқы істер және қауіпсіздік саясаты жөніндегі Жоғарғы өкілі – Еуропалық комиссияның вице-президенті Кая Каллас Еуропалық комиссия мен Қазақстан арасында виза беру тәртібін жеңілдету жөніндегі келісімді бекіту үдерісі басталғанын мәлімдеді.
