2025 жылғы 3 сәуір күні Алматы қаласындағы Нархоз университетінде «Жастар және ғылым» атты халықаралық студенттік конференция жоғары деңгейде ұйымдастырылып өтті. Бұл шара БҰҰ-ның №16 Тұрақты даму мақсаты аясында – әлемдегі бейбітшілік пен әділеттілікті қамтамасыз ету, сондай-ақ тиімді мемлекеттік басқару институттарын нығайтуға бағытталған. Конференцияны университеттің Құқық және мемлекеттік басқару мектебі жыл сайынғы дәстүрлі форматта өткізді.
Конференцияның басты мақсаты – жастардың ғылыми әлеуетін дамыту, студенттердің зерттеу және шығармашылық қабілеттерін ашу, оларды ғылыми қызметке ынталандыру және әлемдік ғылыми қауымдастықпен интеграциялау болды. Сонымен қатар, конференция жастар арасында халықаралық тәжірибе алмасудың бірегей алаңына айналды. Мұндай ауқымды шара жастардың ғылымға бет бұруына серпін беріп қана қоймай, оларды өзекті мәселелерді зерттеуге тарту арқылы қоғамдағы белсенділігін арттырады. Іс-шараның ашылу салтанатында сөз сөйлеген университет президенті, басқарма төрағасы Қанат Қожахмет жастарды ғылым жолында ізденуге шақырып, мұндай конференциялар олардың тұлғалық және кәсіби дамуына ықпал ететінін атап өтті.
Ашылу салтанатында сөз сөйлеген Құқық және мемлекеттік басқару мектебінің директоры, заң ғылымдарының докторы, профессор Талғат Есеналиевич Сәрсенбаев конференцияның мән-маңызына тоқтала отырып: «Бүгінгі конференцияда біз ғылыми зерттеулер нәтижелерін талқылап, білім алмасатын ортақ алаң қалыптастырамыз деп сенеміз. Жастар – біздің болашағымыз. Сол себепті өз сөзімді Мағжан Жұмабаевтың “Мен жастарға сенемін” атты өлеңімен бастағым келді» — деп, қатысушылардың жүрегіне сенім ұялатты.
Осылайша, қазақтың ұлы ақыны Мағжан Жұмабаевтың:
«Арыстандай айбатты,
Жолбарыстай қайратты,
Қырандай күштi қанатты –
Мен жастарға сенемiн!» – деген жалынды жыр жолдары конференция рухын көтеріп, жастарға ерекше шабыт сыйлады.
Конференция барысында сөз алған тарих ғылымдарының кандидаты, қауымдастырылған профессор Ермек Самарович Чукубаев ғылымның жастар өміріндегі рөлін ерекше атап өтіп: «Ғылым – бұл болашаққа апарар ең үлкен есік» – деді. Ол жүргізген «Халықаралық қатынастар» секциясы аясында геосаясат, көші-қон, цифрлық дипломатия және жаһандық қауіпсіздік мәселелері қарастырылды.
Сондай-ақ, жиынға Қазақстанның Ұлттық тұтынушылар лигасының төрайымы, заң ғылымдарының кандидаты Светлана Романовская, профессор Гүлнар Андиржанова сынды елімізге белгілі ғылым қайраткерлері қатысты. Нархоз университетінің білім беру бағдарламаларының жетекшілері – профессорлар Гүлашар Доскеева, Гүлмира Сұлтанбаева, Шолпан Мәлікованың құнды пікірлері жастарға ерекше шабыт сыйлады.
Конференция аралас форматта (офлайн және онлайн) ұйымдастырылып, Қазақстанның түкпір-түкпірінен, сондай-ақ көршілес Өзбекстан, Қырғызстан және Ресей елдерінен келген университеттер мен колледждердің студенттері мен магистранттарын біріктірді. Жалпы, конференцияға 20-ға жуық ЖОО мен 150-ден аса қатысушы өтінім жолдаған.
Баяндамалар үш негізгі секция бойынша ұсынылды:
«Құқық» секциясында халықаралық құқық, киберқауіпсіздік, сыбайлас жемқорлық, экономикалық қылмыстар, есірткі тарату және кәмелетке толмағандар арасындағы құқықбұзушылық мәселелері қаралды. Қатысушылар құқықтық нормалардың жетілдірілуі мен алдын алу шараларына қатысты тың ұсыныстар білдірді.
«Мемлекеттік басқару» секциясында цифрландыру, әлеуметтік және экономикалық саясат, ресурстарды тиімді басқару, сондай-ақ жастарды ғылыми қызметке тарту жолындағы мүмкіндіктер мен кедергілер тақырыптары жан-жақты қарастырылды.
«Халықаралық қатынастар» бағыты бойынша геосаясат, көші-қон, цифрлық дипломатия, халықаралық қауіпсіздік және жаһандық процестерге әсер ететін факторлар сөз болды.
Конференция соңында секцияларда үздік деп танылған студенттер арнайы дипломдармен марапатталды. Сонымен бірге, ерекше номинацияларға ие болған қатысушылар да назардан тыс қалмады. Барлық студенттерге конференцияға қатысқаны туралы сертификаттар табысталды. Ең маңыздысы – олардың баяндамалары электрондық жинаққа еніп, кең аудиторияға ұсынылатын болады.
«Жастар және ғылым» конференциясы – тек ғылыми пікірталас емес, сонымен қатар болашақ көшбасшылардың қалыптасуына ықпал ететін маңызды алаң. Мұнда айтылған идеялар мен ұсыныстар ғылыми ғана емес, практикалық тұрғыда да маңызға ие. Мұндай іс-шаралар Қазақстанның ғылым саласындағы болашағы бар жас буынға сенім арта отырып, оларға нақты қолдау көрсетуге бағытталған.
Аружан Мауленбай
